პოლიტიკური პარტია „გირჩი“ ჰერბერტ ზალბერგის გაკეთებულ განცხადებასთან დაკავშირებით განცხადებას ავრცელებს.
როგორც განცხადებაში წერია, „გირჩი“ მოუწოდებს საქართველოს საგარეო საქმეთა სამინისტროს, სთხოვოს ევროპის კავშირს აღნიშნული განცხადების დეზავუირება და შესაბამისი დიპლომატიური გზებით, საქართველოს ინტერესების დაუზიანებლად, ჰერბერტ ზალბერის სამხრეთ კავკასიაში და საქართველოში კრიზისის საკითხებში ევროკავშირის სპეციალური წარმომადგენელის პოსტიდან გათავისუფლება.
"პოლიტიკური პარტია „გირჩი“ შეშფოთებას გამოთქვამს სამხრეთ კავკასიაში და საქართველოში კრიზისის საკითხებში ევროპის კავშირის სპეციალური წარმომადგენელისა და ჟენევის მოლაპარაკებებში ერთ-ერთი თანათავმჯდომარის, ელჩ ჰერბერტ ზალბერის მიერ ქ. ცხინვალში გაკეთებულ განცხადებებთან დაკავშირებით.
ჩვენ მიგვაჩნია, რომ ევროპელი დიპლომატის მიერ გაკეთებული განცხადება უხეშად არღვევს საერთაშორისო სამართალს და საფრთხეს უქმნის საქართველოს სუვერენიტეტსა და ეროვნულ ინტერესებს. აღნიშნული განცხადება ეჭვქვეშ აყენებს არამარტო საქართველოს ტერიტორიულ მთლიანობასა და ეროვნულ სუვერენიტეტს, არამედ საზღვრების ურღვევობის საერთაშორისოდ აღიარებულ პრინციპებს.
ჩვენთვის უცნაურია ევროპელი დიპლომატის მხრიდან ამ შინაარსის განცხადების გაკეთება ქ. ცხინვალში მინიმუმ ორი მიზეზით: ერთი მხრივ, ევროპის კავშირი წარმოადგენს საქართველოს დამოუკიდებლობის, ტერიტორიული მთლიანობისა და ეროვნული სუვერენიტეტის მტკიცე და თანმიმდევრულ მხარდამჭერს, საქართველოს თავისუფლების ერთ-ერთ საერთაშორისო გარანტორს და საქართველოს საიმედო პარტნიორს, მეორე მხრივ, ჰერბერტ ზალბერს ვიცნობთ, როგორც გამოცდილ და ფრთხილ დიპლომატს.
პოლიტიკური პარტია „გირჩი“ მოუწოდებს საქართველოს საგარეო საქმეთა სამინისტროს, სთხოვოს ევროპის კავშირს აღნიშნული განცხადების დეზავუირება და შესაბამისი დიპლომატიური გზებით, საქართველოს ინტერესების დაუზიანებლად, ჰერბერტ ზალბერის სამხრეთ კავკასიაში და საქართველოში კრიზისის საკითხებში ევროკავშირის სპეციალური წარმომადგენელის პოსტიდან გათავისუფლება", - ნათქვამია განცხადებაში.
ცნობისთვის, ევროკავშირის სპეციალური წარმომადგენელი სამხრეთ კავკასიასა და საქართველოს კრიზისების საკითხებში ჰერბერტ ზალბერი გუშინ ოკუპირებული სამხრეთ ოსეთის ე.წ. პრეზიდენტ ანატოლი ბიბილოვს შეხვდა და აღნიშნული „პოსტის“ დაკავება მიულოცა.
