„რუსი ტურისტების ნაკადს საქართველოში ხელს არაფერი შეუშლის“- განაცხადა პარლამენტის თავმჯდომარე ირაკლი კობახიძემ. მან რუსეთის საგარეო საქმეთა სამინისტროს განცხადებას უპასუხა.
„რუსი ტურისტების ინტერესი საქართველოს მიმართ დიდია და ამ ინტერესს საფრთხეს არაფერი შეუქმნის. ჩვენთვის მთავარია, ჩვენი პრაგმატული პოლიტიკა გავაგრძელოთ, რომელსაც საყოველთაო მხარდაჭერა აქვს. რაც შეეხება ხალხებს შორის ურთიერთობას, ამას განსაკუთრებული მნიშვნელობა აქვს და საქართველოში ტურისტული ნაკადები იზრდება, ამ მიმართულებით მუშაობა უნდა გაგრძელდეს“, - განაცხადა კობახიძემ.
რუსეთის საგარეო საქმეთა სამინისტრომ საკუთარ მოქალაქეებს საქართველოში გამგზავრებამდე რისკების შეფასებისკენ მოუწოდა. მათ ეს განცხადება მას შემდეგ გაავრცელეს, რაც მოსკოვის ყოფილი მერი, იური ლუჟკოვი საქართველოსთვის არასასურველ პირთა სიაში მოხვდა.
