17 მაისს ოჯახის სიწმინდის დღე აღინიშნება. ახალგაზრდული მოძრაობა „დავითიანნი“ ამ დღესთან დაკავშირებით მსვლელობის მოწყობას გეგმავს. ორგანიზაციის ინფორმაციით, საზეიმო მსვლელობა 13:00 საათზე ხატებითა და დროშებით ვარდების მოედნიდან დაიწყება და სამების საკათედრო ტაძარში დასრულდება, სადაც სრულიად საქართველოს კათოლიკოს-პატრიარქი პარაკლის გადაიხდის და მონაწილეებს დალოცავს.
მათივე ინფორმაციით, იგეგმება იმ ოჯახების დააჯილდოებაც, რომელთაც რვა და მეტი შვილი ჰყავთ. წელს პირველად ოჯახის დღესთან დაკავშირებით მსვლელობის გარდა სხვა ღონისძიებებიც იგეგმება.
"დილის 09:00 საათიდან ფილარმონიასთან, პარლამენტთან, ვარდების მოედანსა და პუშკინის სკვერის მიმდებარე ტერიტორიაზე ფოლკლორული ანსამბლების კონცერტები გაიმართება.
17:00 საათზე ვარდების მოედნიდან ავტოკოლონები დაიძვრება, რომელიც თბილსის ყველა უბანს მოივლის", - აცხადებენ "დავითიანნში".
