ფორუმში მონაწილეობდა რუსეთის დელეგაცია, რომლის შემადგენლობაშიც იყო ფოტოზე წარმოდგენილი სენერ გოგუა, - ასე გამოეხმაურა "საპარტნიორო ფონდის" აღმასრულებელი დირექტორი დავით საგანელიძე ჩინეთში ჩინური ჩაის საერთაშორისო ბიზნესფორუმზე გადაღებული ფოტოს შესახებ მედიაში გავრცელებულ ინფორმაციას, სადაც მასთან და სხვა დელეგაციების წევრებთან ერთად თითქოს იმყოფება აფხაზეთის დელეგაციის წევრი.
საგანელიძის განცხადებით, აფხაზეთის დელეგაცია ბიზნესფორუმში არ მონაწილეობდა.
"აფხაზეთის დელეგაცია ბიზნესფორუმში არ მონაწილეობდა. ფორუმში მონაწილეობდა რუსეთის დელეგაცია, რომლის შემადგენლობაშიც იყო ფოტოზე წარმოდგენილი სენერ გოგუა. მისი ვინაობა მედიაში ინფორმაციის გავრცელების შემდეგ შევიტყვე.
რაც შეეხება ოსებთან და აფხაზებთან ურთიერთობას, რომელთაც სამხედრო კონფლიქტებში მონაწილეობა არ მიუღიათ, საქმიანი ვიზიტების დროს მათთან ურთიერთობა თუ მომიწევს, მზად ვარ, ხელი ჩამოვართვა და ჩვენს საერთო ტკივილზე ვესაუბრო.
კატეგორიულად ვაცხადებ, ნებისმიერ ღონისძიებაში, სადაც აფხაზეთი დამოუკიდებელ ქვეყნად იქნება წარმოდგენილი, გამორიცხულია მონაწილეობა მივიღო", - დასძინა საგანელიძემ.
