”ევროპული საქართველოს” წევრი სერგო რატიანი გორში, საკონსტიტუციო ცვლილებების პროექტის საყოველთაო განხილვაზე სიტყვით გამოსვლისას მოსკოვის ყოფილი მერის იური ლუჟკოვის საქართველოში სტუმრობას შეეხო. მისი თქმით, ეს არ უნდა ხდებოდეს იმ ქვეყანაში, რომლის ტერიტორიებიც არის ოკუპირებული.
”არ უნდა გვეუბნებოდნენ იმას, რომ პასპორტში არაფერი ეწერა. პუტინმა რომ გადმოკვეთოს ხვალ საზღვარი, საინტერესოა, იმას პასპორტში რაიმე უწერია? ან კიდევ სხვებმა რომ გადმოკვეთონ. ამიტომ, ეს არ უნდა ხდებოდეს იმ ქვეყანაში, რომლის ტერიტორიებიც არის ოკუპირებული და ის ჯარისკაცები, რომლებიც იცავდნენ ქვეყანას, იმათი გადაცემა არ უნდა ხდებოდეს. გია ცერცვაძის შემთხვევას ვგულისხმობ”,- განაცხადა რატიანმა.
რატიანის ამ განცხადებას დარბაზში ხმაური მოჰყვა, რის შემდეგაც დეპუტატმა დარბაზს კითხვით მიმართა: ”ლუჟკოვი უნდა დადიოდეს ამ ქვეყანაში”?
ამის შემდეგ რატიანმა საუბარი კონსტიტუციის პროექტზე გააგრძელა. სერგო რატიანის გამოსვლას მოქალაქეების მხრიდან ხმამაღალი შეძახილები მოჰყვა, მას „ნაციონალურ მოძრაობაში“ ყოფნის წლები გაუხსენეს.
სიტუაციის განეიტრალება სცადა პარლამენტის თავმჯდომარემ, მან შეკრებილებს სინშვიდისაკენ მოუწოდა.
„მშვიდად მოვუსმინოთ ყველას. თითოეულ გამომსვლელს მოვუწოდებ, რომ პოლიტიკური გრძნონების პროვოცირება არ მოახდინოს, რომელიც ხალხს მძიმე შავ-ბნელ წარსულს გაახსენებს. ძალიან გთხოვთ, თითოეულ თქვენგანს. აქ იყო საუბარი პოლიტიკურ საკითხებზე, ბატონო სერგო. ჩვენ კონსტიტუციაზე უნდა ვისაუბროთ. აქ საუბარი იყო ისეთ თემებზე, რომელიც აქ არ უნდა გეხსენებინათ. ჩვენ აქ არ დაგვიწყია ცხრა წელზე საუბარი. ჩვენ ვსაუბრობთ კონსტიტუციაზე, ეს არის ჩვენთვის პრინციპულად მნიშვნელოვანი. არც 9 წელს გახსენებთ, არც ქუჩაში ხალხის დახოცვას. ამას არ გახსენებთ, ჩვენ ვსაუბრობთ საქართველოს კონსტიტუციაზე“, - განაცხადა ირაკლი კობახიძემ.
