მნიშვნელოვანი პროგრესი აღინიშნება იმ პრობლემების მოგვარებაში, რომლებსაც ადგილი ჰქონდა ქართულ მართლმსაჯულებაში, - განაცხადა საქართველოში აშშ-ის ელჩის მოადგილე ნიკოლას ბერლინერმა საზოგადოებრივ ფორუმზე „საქართველოს სასამართლო სისტემა: რეფორმების შედეგები და პერსპექტივები“ სიტყვით გამოსვლისას.
„ბოლო წლების განმავლობაში მნიშვნელოვანი პროგრესი აღინიშნება იმ პრობლემების მოგვარებაში, რომლებსაც ადგილი ჰქონდა ქართულ მართლმსაჯულებაში, მათ შორის, მიღებული იყო რიგი საკანონმდებლო ცვლილებები და განხორციელდა რეფორმა, რომლის მიზანი სასამართლო ინსტიტუტების დამოუკიდებლობის გაზრდაა“, - აღნიშნა ნიკოლას ბერლინერმა.
მისივე თქმით, აშშ თანმიმდევრულად უჭერდა მხარს ამ სექტორში რეფორმების გატარებას.
,,ჩვენ ასევე მხარს ვუჭერდით სამოქალაქო საზოგადოების ორგანიზაციებს მათ ძალისხმევაში, კრიტიკულად და ღიად შეეფასებინათ ეს რეფორმები და ის ნაკლი, რაც კიდევ არსებობს“, - დასძინა ელჩის მოადგილემ.
მისი თქმით, იმედოვნებს, რომ აღნიშნული დისკუსიების ფარგლებში შემუშავებული იქნება რეკომენდაციები, ზომები საქართველოსთვის ამ ძალიან მნიშვნელოვან საკითხთან მიმართებაში.
