საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარის, რომან კაკულიას განცხადებით, მუშავდება კანონპროექტი, რათა მოხდეს შრომის ინსპექტირება.
მან ტყიბულში დაღუპული მეშახტეების ოჯახებს მიუსამძიმრა და იმ რეგულაციებზე ისაუბრა, რომელიც ამ სფეროს აწესრიგებს.
"დღეისთვის ეს სფერო დარეგულირებულია "შრომის კოდექსის" 35-ე მუხლით, ასევე "წიაღის შესახებ" კანონითა და მთავრობის სპეციალური დადგენილებით, რომელიც ასეთი ტიპის შახტებში უსაფრთხოების ნორმებს ადგენს. "წიაღის შესახებ" კანონის მიხედვით, დამსაქმებელს გაწერილი ვალდებულება აქვს, რათა უსაფრთხოების ნორმები დაცული იყოს, იმ პირთა წრე განსაზღვროს, რომელთაც კანონის შესაბამისი ქმედებები უნდა შეიმუშაონ და პერიოდულად, ამ წესებთან დაკავშირებით, საწარმოში მომუშავე ადამიანების ინსტრუქტაჟი და ინფორმირება გააკეთონ. ამ ყველაფერს გამოძიება შეისწავლის. წინასწარი მონაცემებით, იმ ინფორმაციაზე დაყრდნობით, რაც თვითმხელებისგან გვაქვს, ასეთი მოსაზრება იკვეთება, რომ შესაძლებელია, ადგილი ჰქონდეს უსაფრთხოების ნორმების დარღვევას ადგილზე. ცხადია, ამ ყველაფერს გამოძიება დაადგენს“,- განაცხადა კაკულიამ.
როგორც მან განაცხადა, საკანონმდებლო ცვლილებები წელს განხორციელდება და შეიქმნება შრომითი უფლებების დაცვის ქმედითი მექანიზმი.
