„საუბარია ეროვნული უშიშროების საბჭოს ჩანაცვლებაზე თავდაცვის საბჭოთი“,-განაცხადა პარლამენტის თავმჯდომარე ირაკლი კობახიძემ კონსტიტუციის პროექტის საყოველთაო-საჯარო განხილვაზე. მან უშიშროების საბჭოს მომავალზე ისაუბრა და მისი გაუქმების აუცილებლობის არგუმენტები დაასახელა.
„რაც შეეხება უფლებამოსილებებს - გვაქვს ორი არსებითი ცვლილება. პირველი - საქმე ეხება უზენაესი სასამართლოს მოსამართლეთა წარდგენას და აქ გვაქვს 2010 წლის ვენეციის კომისიის რეკომენდაცია, სადაც შავით თეთრზე წერია, რომ უმჯობესია ამ კომპეტენციის იუსტიციის უმაღლესი საბჭოსთვის გადაცემა, რათა ინსტიტუციურად უკეთესად მოგვიწესრიგდეს ეს საკითხი და მეორე, საქმე ეხება ეროვნული უშიშროების საბჭოს. საუბარია ეროვნული უშიშროების საბჭოს ჩანაცვლებაზე თავდაცვის საბჭოთი, რომელიც მოქმედებს საომარი მდგომარეობის პირობებში. ესეც იყო ვენეციის კომისიის რეკომენდაცია 2010 წელს. ისინი პირდაპირ ამბობდნენ, რომ ამ სისტემასთან საერთო არაფერი აქვს არსებული სახით უშიშროების ეროვნულ საბჭოს, რადგან ეროვნული უშიშროების საბჭო რჩევას აძლევს პრეზიდენტს იმ საკითხებზე, რომელიც არის რეალურად მთავრობის უფლებამოსილების ქვეშ. ეს არის მარტივი იურიდიული ნონსენსი. ისინი ჯერ კიდევ 2010 წელს გვირჩევდნენ ამ ნონსენსის გამოსწორებას. რაც არ გაკეთდა მაშინ, კეთდება დღეს“, - ამბობს პარლამენტის თავმჯდომარე.
