საკონსტიტუციო ცვლილებების საყოველთაო-სახალხო განხილვა ბათუმის უნივერსიტეტში 12:00 საათზე დაიწყო. განხილვას პირველად ესწრება საქართველოს პრეზიდენტი.
საქართველოს პარლამენტის თავმჯდომარის განცხადებით, სახელმწიფო საკონსტიტუციო კომისიამ მიიღო გადაწყვეტილება, რომ არ გადაესინჯა ტერიტორიული მოწყობის საკითხები.
როგორც ირაკლი კობახიძემ განაცხადა კონსტიტუციის გადასინჯვის დროს არ დარჩენილა არც ერთი პუნქტი და მუხლი, რომელსაც ცვლილება არ შეეხო.
მისივე თქმით, კომისიამ მიიღონ პრინციპული გადაწყვეტილება, რომ საქართველოს კონსტიტუციაში არსებითად არ გადაესინჯა ტერიტორიული მოწყობის საკითხები.
„ეს იყო პრინციპული გადაწყვეტილება, ჩვენ კონსტიტუციაში 1995 წელს ჩაიდო გზავნილი, რომლის თანახმადაც, ხელისუფლება არ შეეხება ტერიტორიული მოწყობის საკითხებს, ვიდრე არ დადგება ტერიტორიული მთლიანობის აღდგენის საკითხი, არ გახდება შესაძლებელი კონსულტაციების წარმოება აფხაზეთის და ცხინვალის რეგიონის მოსახლეობასთან. გზავნილი არის ასეთი, რომ ჩვენ აფხაზეთის და ცხინვალის რეგიონის გარეშე არ შევეხებით ტერიტორიული მოწყობის საკითხებს. ეს გზავნილი ვფიქრობთ, რომ უნდა დარჩენილიყო მოქმედ კონსტიტუციაში და ეს გადაწყევტილება იქნა კიდეც მიღებული“, - განაცხადა კობახიძემ.
კონსტიტუციის ახალი პროექტის საჯარო განხილვა 5 მაისს დაიწყო და მისი წარდგენა სულ 11 ქალაქშია დაგეგმილი. საყოველთაო განხილვების პროცესი 15 მაისს, თბილისში დასრულდება.
