საქართველოს საგარეო პრიორიტეტები კონსტიტუციის გარდამავალ დებულებაში ჩაიწერება, - განაცხადა საქართველოს პარლამენტის თავმჯდომარემ ქუთაისში, კონსტიტუციური ცვლილებების საყოველთაო-სახალხო განხილვისას, რომელიც ლადო მესხიშვილის სახელობის თეატრში მიმდინარეობს.
„კონსტიტუციის ბოლო თავში, გარდამავალი დებულებების თავში, მნიშვნელოვანი დამატება გვაქვს, სადაც ერთგვარი დავალების სახით, კონსტიტუციური ორგანოებისთვის გაწერილია ამოცანა, რომ მათ მიიღონ ყველა ზომა ევროპულ და ევროატლანტიკურ სტრუქტურებში, ევროკავშირსა და ნატოში საქართველოს სრული ინტეგრაციის უზრუნველსაყოფად. ეს მნიშვნელოვანი ამოცანა, ჩვენი საგარეო პრიორიტეტი, პირდაპირ არის ასახული საქართველოს კონსტიტუციის ახალ რედაქციაში, რაც ძალიან მნიშვნელოვანი განაცხადია“, - აღნიშნა ირაკლი კობახიძემ.
