გაფართოებისა და სამეზობლო პოლიტიკის საკითხებში ევროკომისარ იოჰანეს ჰანის შეფასებით, საქართველომ ასოცირების შეთანხმების შესასრულებლად, შესანიშნავი ნაბიჯები გადადგა. ამის შესახებ ევროკომისარმა პრემიერ-მინისტრ გიორგი კვირიკაშვილთან გამართული შეხვედრის შემდეგ, ერთობლივ ბრიფინგზე განაცხადა.
იოჰანეს ჰანის თქმით, პრემიერს მოუწოდს, რომ ხალხთან იმუშაოს და ოპოზიციასთან დიალოგი გამართოს.
„საქართველომ შესანიშნავი ნაბიჯები გადადგა ასოცირების შეთანხმების შესასრულებლად და კვლავაც განაგრძობს ამ პროცესს, რომელიც მიზნად ისახავს დემოკრატიული პროესების კონსოლიდაციას, კანონის უზენაესობის განმტკიცებასა და კარგი მმართველობის ჩამოყალიბებას. დღეს ვისაუბრეთ საკონსტიტუციო რეფორმაზე. პრემიერს მოვუწოდე, რომ ხალხთან იმუშაოს და ოპოზიციასთან დიალოგი გამართოს. მივესალმებით, ვენეციის კომისიის შეფასებას და ასევე, ვისაუბრეთ ევროპული სკოლის გახსნაზე, რომელიც ხელს შეუწყობს ევროპული კულტურის უკეთ გაცნობას“, - განაცხადა ევროკომისარმა.
იოანეს ჰანის თქმით, ქვეყანაში რეფორმები უნდა გაგრძელდეს, რათა საქართველომ უვიზო მიმოსვლით მეტი სარგებელი ნახოს. ევროკომისარის ინფორმაციით უვიზო მიმოსვლით საქართველოს 10 ათასმა მოქალაქემ უკვე ისარგებლა.
