ყველა თანხმდება იმაზე, რომ მომავალი კონსტიტუცია არის ფუნდამენტური საკითხი, რასთან დაკავშირებითაც საზოგადოების, პოლიტიკური სპექტრის და სხვა ინსტიტუციების ერთობლივი მუშაობა მნიშვნელოვანია, - ამის შესახებ პრეზიდენტის პოლიტიკურმა მრჩეველმა ფიქრია ჩიხრაძემ კონსტიტუციის თემაზე პრეზიდენტთან პოლიტიკოსებისა და არასამთავრობო ორგანიზაციების შეხვედრის დასრულების შემდეგ, ჟურნალისტებს განუცხადა.
ჩიხრაძის განცხადებით, თუ კონსტიტუციასთან დაკავშირებით, კონკრეტული მიმართულებებით იქნება გარკვეული ფორმატების შექმნის სურვილი, პრეზიდენტი მზადაა საკითხი განიხილოს.
"პრეზიდენტი უკვე კარგა ხანია მაქსიმალურად უწყობს ხელს საზოგადოების აქტიურ ჩართულობას საკონსტიტუციო დისკუსიებსა და განხილვებში. თავად პრეზიდენტიც მონაწილეობს ასეთ პროცესში. რაც შეეხება კონკრეტულ ინიციატივებს, რომლებიც აქვთ პოლიტიკურ პარტიებს, სამოქალაქო საზოგადოების წარმომადგენლებს, პრეზიდენტმა დააფიქსირა თავისი მოსაზრება, რომ ის მიესალმება მაქსიმალურ აქტივობას და მეტიც, მოუწოდა კიდევ უფრო მეტი აქტიურობისკენ, რათა საზოგადოება რაც შეიძლება მეტი ჩართულობით იყოს ამ პროცესში წარმოდგენილი და კონსტიტუცია იყოს მაქსიმალურად გამართული, დაბალანსებული. ჩვენ არ ვაპირებთ რაიმე ერთიანი კამპანიის წარმოებას, ყველას აქვს თავისი გეგმა ამ მიმართულებით. თუმცა, ინტერესი ვისიც არის, რომ უკეთესი კონსტიტუცია მივიღოთ, ჩვენ ყოველთვის მზად ვიქნებით ამ ინიციატივებს დავუჭიროთ მხარი. პრეზიდენტმა შესთავაზა ისიც, რომ თუ კონკრეტული მიმართულებებით იქნება გარკვეული სურვილი, შეიქმნას ფორმატები, ამის განხილვისთვის მზად არის. შეხვედრა იყო ძალიან საინტერესო. ყველა თანხმდება იმაზე, რომ მომავალი კონსტიტუცია არის ფუნდამენტური საკითხი, რასთან დაკავშირებითაც საზოგადოების, პოლიტიკური სპექტრის და სხვა ინსტიტუციების ერთობლივი მუშაობა მნიშვნელოვანია", - აღნიშნა ჩიხრაძემ.
