საკონსტიტუციო ცვლილებების პროექტში დამატებითი ცვლილებების შეტანას პარლამენტის პირველი ვიცესპიკერი თამარ ჩუგოშვილი არ გამორიცხავს. მისი თქმით, მმართველ გუნდს წინ აქვს საერთო-სახალხო განხილვები, ასევე პარლამენტში საკომიტეტო მოსმენები, რომელთა დროსაც, შესაძლებელია, საკონსტიტუციო ცვლილებების პროექტში დამატებითი ცვლილებები განხორციელდეს.
"ვაპირებთ მოვისმინოთ მოსახლეობის მოსაზრებები ისევე როგორც აქტიური განხილვები გვქონდეს საპარლამენტო მუშაობის პროცესში. ასე, რომ კონსტიტუციის პროექტში გარკვეული ცვლილებები მოხდება, თუმცა რას შეეხება ზუსტად ეს ცვლილებები, ახლა ვერ გეტყვით", - განაცხადა ჩუგოშვილმა.
პარლამენტის პირველმა ვიცესპიკერმა ასევე აღნიშნა, რომ საკონსტიტუციო ცვლილებების პროექტზე ბევრი პოლიტიკური პირის პოლიტიკური ინტერესი იკვეთება,
"შესაბამისად, სრულიად განსხვავებული მოსაზრებები გვესმის. ამიტომ, ჩვენთვის ძალიან მნიშვნელოვანია გარე ობიექტური დამკვირვებლების მოსაზრებები, რომ სისტემურად სწორი გადაწყვეტილება მივიღოთ. ჩვენ გვექნება ვენეციის კომისიის დასკვნაც და ამ ყველაფრის გათვალისწინებით, რა თქმა უნდა, გარკვეული ცვლილებები საბოლო პროექტში აისახება", - განმარტა ჩუგოშვილმა.
