ჩვენს რეგიონს სჭირდება საქართველო, როგორც ეკონომიკური და ნორმატიული ცენტრი, - ამის შესახებ პრემიერ-მინისტრმა გიორგი კვირიკაშვილმა საქართველო-ამერიკის დიპლომატიური ურთიერთობების 25 წლისთავისადმი მიძღვნილ ფორუმზე სიტყვით გამოსვლისას განაცხადა.
პრემიერის განცხადებით, საქართველოს ჰარმონიაში მოჰყავს ინფრასტრუქტურა და ნორმატიული ბაზა, რათა იქცეს შავი ზღვის სანაპიროს სამხრეთ ნაწილში ისეთ ადგილად, სადაც ჩქეფს ბიზნესი, სადაც ერთმანეთს ხვდება სავაჭრო და ენერგეტიკული მარშრუტები და სადაც ღირებულებათა ჯაჭვები ერთმანეთთანაა შერწყმული.
"ჩვენ ერთმანეთთან ჰარმონიაში მოგვყავს ჩენი ინფრასტრუქტურა და ნორმატიული ბაზა, რათა ვიქცეთ შავი ზღვის სანაპიროს სამხრეთ ნაწილში ისეთ ადგილად, სადაც ჩქეფს ბიზნესი, სადაც ერთმანეთს ხვდება სავაჭრო და ენერგეტიკული მარშრუტები და სადაც ღირებულებათა ჯაჭვები ერთმანეთთანაა შერწყმული. საქართველო არა მხოლოდ მზად არის, შეასრულოს დერეფნისა და სატრანსპორტო და ენერგეტიკული ცენტრის როლი ჩვენს რთულ რეგიონში, არამედ მას მტკიცედ აქვს გადაწყვეტილი იყოს აშშ-ის საყრდენი, სანდო პარტნიორი და ჩვენი საერთო პოლიტიკური, სავაჭრო და უსაფრთხოების ინტერესების ერთგული დამცველი. გარდა უსაფრთხოების სფეროში მზარდი თანამშრომლობისა, ჩვენ კიდევ უფრო უნდა განვამტკიცოთ ეკონომიკური კავშირები ჩვენს ქვეყნებს შორის. დარწმუნებული ვარ, რომ თუკი ჩვენ გავაგრძელებთ მშენებლობას ჩვენი ახლო პოლიტიკური ურთიერთობების მტკიცე საფუძველზე, ძალიან მალე ამერიკასთან ორმხრივმა ვაჭრობამ შეიძლება მილიარდ დოლარსაც გადააჭარბოს”, - განაცხადა გიორგი კვირიკაშვილმა.
მან აქვე აღნიშნა, რომ საქართველოში მტკიცედ სწამთ ევროატლანტიკური მომავალი. მისივე თქმით, ის დარწმუნებულია, რომ საერთაშორისო პარტნიორები და პირველ რიგში აშშ აცნობიერებენ და აღიარებენ საქართველოს წარმატებას ბოლო წლების განმავლობაში.
"ჩვენ ვაფასებთ და ვიზიარებთ ჩვენი დასავლელი პარტნიორების ფუნდამენტურ ღირებულებებს. ჩვენ დავადასტურეთ ჩვენი ურყევი გადაწყვეტილება და სიმტკიცე ჩვენი მიზნების მიღწევის გზაზე და მომავალშიც ასე გაგრძელდება. დარწმუნებული ვარ, რომ ჩვენი პარტნიორები აცნობიერებენ და აღიარებენ საქართველოს წარმატებას ბოლო წლების განმავლობაში. ჩვენ მადლობელნი ვართ მხარდაჭერისთვის, განსაკუთრებით საქართველოს სუვერენიტეტსა და ტერიტორიულ მთლიანობასთან, ასევე არაღიარების პოლიტიკასთან დაკავშირებით. ჩვენ იმედის თვალით შევყურებთ ამერიკის შეერთებულ შტატებთან მჭიდრო სტრატეგიული პარტნიორობის გაღვივების გაგრძელებას. დარწმუნებული ვარ, რომ ერთად ჩვენ შევძლებთ როგორც რეგიონალური, ისე გლობალური მასშტაბით კეთილდღეობისა და უსაფრთხოების უზრუნველყოფას”, - დასძინა პრემიერმა.
