მიხარია, რომ ვხედავ მშვიდობას, სტაბილურობას, თუ როგორ ძლიერდება დემოკრატია ქვეყანაში, - ამის შესახებ საქართველოში აშშ-ის ყოფილმა ელჩმა კენეტ იალოვიცმა საქართველო- ამერიკის დიპლომატიური ურთიერთობების 25 წლისთავისადმი მიძღვნილ ფორუმზე ჟურნალისტებს განუცხადა, რომელიც თბილისში, ათონელის ქუჩაზე აშშ-ს საელჩოს ყოფილ შენობაში მიმდინარეობს.
მისი თქმით, საქართველოს და ამერიკას აქვთ კარგი ურთიერთობა და ძლიერი პარტნიორობა, რომელიც დამყარებულია საერთო ღირებულებებზე, როგორიცაა - დემოკრატია და ადამიანის უფლებები.
"ძალიან სასიამოვნოა, რომ აქ ვიმყოფები. შევხვდი ძალიან ბევრ მეგობარს, რომელთანაც ერთად ვმუშაობდი ისტორიულ პერიოდში. ნამდვილად, ქვეყანა ძალიან შეიცვალა და განვითარდა. ძალიან მიხარია, რომ ვხედავ მშვიდობას, სტაბილურობას, თუ როგორ ძლიერდება დემოკრატია ქვეყანაში. კიდევ ერთხელ ვიტყვი იმას, რომ ძალიან მიხარია, აქ ყოფნა. ჩვენ გვაქვს ძალიან კარგი ურთიერთობა, ძლიერი პარტნიორობა, რომელიც დამყარებულია საერთო ღირებულებებზე და ეს ღირებულებებია - დემოკრატია, ადამიანის უფლებები და ჩვენ სწორედ ეს გვაერთიანებს. კიდევ ერთხელ გილოცავთ 25 წლისთავს”, - განაცხადა იალოვიცმა.
