საქართველოს სახელმწიფო საკონსტიტუციო კომისიის მიერ მომზადებული პროექტით, პარლამენტის ადგილსამყოფელი კონსტიტუციით განსაზღვრული აღარ იქნება.
კომისიის მიერ მომზადებული პროექტი დღეს, სამუშაო ჯგუფის წევრებს გადაეგზავნათ. აღნიშნული პროექტის მესამე თავში საუბარია პარლამენტის სტატუსსა და უფლებამოსილებაზე, თუმცა არაფერია ნათქვამი საკანონმდებლო ორგანოს ადგილსამყოფელზე. კერძოდ, მოქმედი კონსტიტუციიდან განსხვავებით, პროექტში ის ჩანაწერი აღარ არის, სადაც აღნიშნულია, რომ პარლამენტის ადგილსამყოფელია ქალაქი - ქუთაისი.
პროექტში ხაზგასმულია ის, რომ საქართველოს პარლამენტი ქვეყნის უმაღლესი წარმომადგენლობითი ორგანოა, რომელიც საკანონმდებლო ხელისუფლებას ახორციელებს, ქვეყნის საშინაო და საგარეო პოლიტიკის ძირითად მიმართულებებს განსაზღვრავს და კონსტიტუციით განსაზღვრულ ფარგლებში, მთავრობის საქმიანობას კონტროლს უწევს და სხვა უფლებამოსილებებს ახორციელებს.
