"კონკრეტული პარტიებისა თუ პიროვნებების გადაწყვეტილებებზე ინფორმაცია არ მაქვს",- ამის შესახებ ვიცეპრემიერმა, კახა კალაძემ საკონსტიტუციო კომისიიდან პარტიების გასვლის შესახებ საუბრისას განაცხადა.
მისი თქმით, თავიდანვე იყო დაგეგმილი, რომ გარკვეული პარტიები საკონსტიტუციო კომისიას დატოვებდნენ.
"გავრცელებული იყო ინფორმაცია, რომ გარკვეული არასამთავრობოები, კონკტეტული პიროვნებები ამის გაკეთებას გეგმავდნენ. მთავარია ერთი, კომისიამ მართლა იმუშავა. მასშტაბური სამუშაო გახლდათ. უნდა მივიღოთ ისეთი კონსტიტუცია, როგორიც სჭირდება ჩვენს ქვეყანას. დარწმუნებული ვარ, რომ საკონსტიტუციო კომისია ისეთ კონსტიტუციას მიიღებს, როგორიც ქვეყანას სჭირდება",- აღნიშნა კალაძემ.
ცნობისთვის, სახელმწიფო საკონსტიტუციო კომისია ოპოზიციურმა პარტიებმა, "ერთიანი ნაციონალურმა მოძრაობამ", "სახელმწიფო ხალხისთვის" და "დემოკრატიულმა მოძრაობამ" დატოვეს. საკონსტიტუციო კომისიამ მუშაობა დაასრულა. კომისიის სამუშაო ჯგუფების მიერ მომზადებულ პროექტს კენჭს 22 აპრილს უყრიან. მიღებული დოკუმენტი ვენეციის კომისიას გადაეგზავნება და საყოველთაო-სახალხო განხილვისთვის საქართველოს მოქალაქეებს წარედგინებათ.
