„ნაციონალური მოძრაობის“ საპარლამენტო ფრაქციის თავმჯდომარე, რომან გოცირიძე საკონსტიტუციო კომისიის მიერ პრეზიდენტის არჩევითობის შესაძლო ცვლილებას აფასებს, მან ამის შესახებ „ჯი-ეიჩ-ენთან“ ისაუბრა.
მისი თქმით, „ნაციონალური მოძრაობის“ მიერ კომისიის დატოვების შემდგომ შესაძლოა ვენეციის კომისიამ სხვა დამოკიდებულება გამოხატოს მათი მუშაობის მიმართ, ვინაიდან საქმე ეხება ქვეყნის ძირითად კანონს და არა უბრალოდ დოგმატურ აქტს.
„ვენეციის კომისიამ უნდა გააცნობიეროს, რომ კონსტიტუცია არაა რაღაც დოგმატური აქტი,. ქვეყანაში არსებული კონსტიტუცია რეალობას უნდა ასახავდეს. ის, რომ პრეზიდენტის არაპირდაპირი არჩევნები ხდება ისრაელში, ავსტრიაში ან თუნდაც სხვა ქვეყანაში , არ ნიშნავს, რომ საქართველოსთვის ნიმუში შეიძლება იყოს. ვინაიდან საქართველოში არის არაფორმალური ოლიგარქიული მმართველობა და ხელისუფლების წყარო არის არა ხალხი, არამედ ერთი ადამიანი, ხალხის მიერ არჩეულ პრეზიდენტს, რომელსაც აქვს მეტი ლეგიტიმაცია, მეტი ზურგი და ხალხის მხარდაჭერა. ასეთი პრეზიდენტი უფრო გაცილებით ქმედითუნარიანი იქნება, ვიდრე პარლამენტის მიერ დანიშნული „ქართული ოცნების“ დეპუტატი. „ქართული ოცნება“, ეს არის გუნდი, მთავრობა და პარლამენტი, ანუ „ ქართული ოცნების ვარსკვლავები“, პირველი ეშელონი. მეორე ეშელონი პირველთან ვერ მივა, პირველი არ უქნია ღმერთს და მეორე რა იქნება. წარმოგიდგენიათ აქედან ვინმე რომ ყოფილიყო პრეზიდენტი? თუნდაც ერთხელ რომ ვეტო დაედო, ერთხელ რომ ივანიშვილს შეწინააღდეგებოდა? ნებისმიერი „ქართული ოცნების“ ცნობადი სახე, უცებ დახუჭეთ თვალები და დასვით პრეზიდენტად, იქნებოდა აბსოლუტურად ყურმოჭრილი მონა. თუნდაც იგივე მოსმენების კანონზე, თუნდაც ეროვნული ბანკის კანონზე იგივე პოზიციისა იქნებოდა, როგორც ნებისმიერი „ქართული ოცნების“ წარმომადგენელი. ამგვარად იგი იქნებოდა „ქართული ოცნების“ ნოტარიუსი, რომელიც მოაწერდა კანონს ხელს. დედოფალივითაც კი არ იქნებოდა, მას რაღაც უფლებები მაინც აქვს“,- განაცხადა რომან გოცირიძემ „ჯი-ეიჩ-ენთან“ საუბარში.
