საქართველოს პრეზიდენტი გიორგი მარგველაშვილი მიიჩნევს, რომ რუსული ენა არის საშუალება, რომლითაც რუსულ პროპაგანდისტულ მანქანას უნდა დავუპირისპირდეთ. შესაბამისად მისი დავიწყება მიზანშეწონილი არ არის.
ნატო-საქართველოს სახალხო დიპლომატიის ფორუმის მეორე დღეს მთავარი თემა- დეზინფორმაცია და ჰიბრიდულ ომში მედიის როლია. შეხვედრის მონაწილეები სასტუმროში რედისონ ბლუ ივერიაში არიან შეკრებილი. მათ საქართველოს პრეზინდეტმა სიტყვით მიმართა.
„არაფრის დიდებით არ უნდა ჩავხსნათ ეს საინფორმაციო იარაღი, რომელიც ჩვენ გვაქვს ხელში და ბევრად მეტად უნდა იყოს გამოყენებული ერთიანი მესიჯის მისატანად. თუ ჩვენ დავტოვებთ აფხაზებს, ოსებს და სხვა ეთნიკურ უმცირესობებს ერთი-ერთზე (კიდევ ერთხელ, არა ცუდ რუსულ პროპაგანდისტულ მანქანასთან, რომელიც კარგად და ეფექტურად მუშაობს), მაშინ არ ვიცი, რის ხარჯზე ვაპირებთ ამ ადამიანების ინტეგრაციას. ასე რომ, ჩემი აზრით, რუსული ენა ნამდვილად არ უნდა იქნას დავიწყებული საქართველოში, არამედ აქტიურად უნდა იყოს გამოყენებული”, - განაცხადა პრეზიდენტმა.
როგორც გიორგი მარგველაშვილმა აღნიშნა, „როდესაც შენ გაგაჩნია ძალა და სიმართლე, შენ არ უნდა ჩახსნა ამ სიმართლის გავრცელების საშუალებები“.
გიორგი მარგველაშვილმა იმ გამოწვევებზე ისაუბრა, რომელიც რეგიონში არსებობს. პრეზიდენტის თქმით, მთავარი გამოწვევა დღეს არის უსაფრთხოების შესუსტებული გარემო რეგიონში, ჰიბრიდული ომი, კიბერ დაპირისპირებები და საზოგადოებრივ აზრზე აგიტაციის მეშვეობით ზეგავლენის მცდელობა, რომელსაც გიორგი მარგველაშვილის განცხადებით, რუსეთი ახორციელებს.
