გადაცემა „რეაქციის“ ეთერში „ევროპული საქართველოს“ ლიდერმა, გიგი უგულავამ პრეზიდენტის გამოსვლა შეაფასა. მისი თქმით ეს იყო ძალიან სუსტი გამოსვლა და ანგარიშში არ მოხვდა კონკრეტული ფაქტები.
„ჩვენ დღეს ვიხილეთ ძალიან სუსტი პრეზიდენტის არაფრისმთქმელი გამოსვლა, მაგრამ იმდენად არაადეკვატური რეაქცია იყო მთავრობის, იმდენად გულისამრევი, რომ ბუნებრივად შეიძლება იქითკენ გადაიხარო, როცა სენტიმენტები შეიძლება გაუჩნდეს ადამიანს მარგველაშვილის მიმართ, რომლის გამოსვლაც იყო ძალიან სუსტი.
მთავრობამ არჩევნების შემდეგ 40.000 ადამიანს გაუუქმა სოციალური დახმარება. მე გუშინ ვიყავი ერთერთ სოფელში, ხაშურის რაიონში. მაისურაძეების ოჯახს, სადაც უსინათლო ქალბატონს ნახევრად უსინათლო ქმარი უვლის, გაუუქმეს სოციალური დახმარება რადგან მათ შვილი გარდაეცვალათ და შუქის ხარჯი გაიყო ორზე, ქულა მოემატათ. ასეთი შემთხვევა უკვე 40 ათასია და როდესაც მსგავსი ხდება, ეს უნდა მოხვდეს პრეზიდენტის გამოსვლაში.“- განაცხადა გიგი უგულავამ.
მან პრეზიდენტის მიმართ მის პირად დამოკიდებულებაზეც ისაუბრა, მისი თქმით, გიორგი მარგველაშვილი პრეზიდენტის როლში არის საკმაოდ სუსტი და ვერ იქნება ხალხის დაცვის გარანტი.
„პრეზიდენტ მარგველაშვილთან არანაირი პირადი წყენა არ მაქვს. მე მასთან მქონდა ადამიანური ურთიერთობა. მაგრამ, ის რომ მარგველაშვილი არის კარგი პრეზიდენტი, ადამიანების სოციალური თუ პოლიტიკური უფლებების დაცვის გარანტი, ეს ასე არ არის. გვყავს პრეზიდენტი, რომელიც ამას უყურებს როგორც სამსახურს, გვყავს პრეზიდენტი, რომელიც უბრალო დამკვირვებელია და ის მთავრობის კრიტიკაში თანმიმდევრული არ არის.- განაცხადა უგულავამ.
