"ვფიქრობ, ჩვენი ქვეყნის წინაშე მდგარი მთავრი ამოცანა ხალხისთვის რწმენის დაბრუნებაა, რათა იცოდნენ, რომ საქართველოს მომავლისთვის გადამწყვეტი სიტყვა მათ ეკუთვნით და არა ქვეყნის არაფორმალურ მმართველს. ძალაუფლება ქართველ ხალხს ეკუთვნის" - ასე მიმართა ერთიანი ნაციონალური მოძრაობის დეპუტატმა სალომე სამადაშვილმა პრეზიდენტს.
"ჩვენ ნათლად ვხედავთ, რომ ქართული სახელმწიფო და ახალგაზრდა დემოკრატია ყოფნა-არ ყოფნის საფრთხის წინაშე დგას. ვფიქრობ, პრეზიდენტს ამ პრობლემაზე ბევრად მეტი უნდა ესაუბრა.
დღეს საქართველო ძალიან სწრაფად ემსგავსება გაუგებარი პოლიტიკური სისტემის, ოლიგარქიული მმართველობის რეჟიმის მქონე ქვეყანას, სადაც საგარეო და საშინაო პოლიტიკას არა მოსახლეობის მიერ არჩეული წარმომადგენლები განსაზღვრავენ, არამედ ადამიანი, რომელსაც არანაირი პასუხისმგებლობა არ გააჩნია და რეალურად ყველა მნიშვნელოვან გადაწყვეტილებას იღებს. სწორედ ამიტომ ეცემა საზოგადოებაში სახელმწიფო ინსტიტუტების მიმართ ნდობა.
ნეპოტიზმი და კორუფცია დაბრუნდა ჩვენს ცხოვრებაში და ჩვეულ მოვლენად იქცა ის, რომ ქუჩებში პირადი თუ პოლიტიკური მიზნებით ნადირობენ ადამიანებზე" - განაცხადა სამადაშვილმა.
