ე.წ. „ციანიდის საქმეზე“ დაკავებული დეკანოზი გიორგი მამალაძე სასამართლომ პატიმრობაში დატოვა. დაცვის მხარე დეკანოზისთვის გირაოს სახით 20.000 ლარის შეფარდებას ითხოვდნენ, მათი თქმით გამოვლინდა ახალი გარემოება, რომლის გამოც დეკანოზმა უნდა დატოვოს საპატიმრო დაწესებულება. სასამართლომ არ გაიზიარა დაცვის მხარის მოთხოვნა და აღკვეთის ღონისძიებად კვლავ პატიმრობა დატოვა.
სხდომა დღეს 17:00 საათზე დაიწყო და ბრალდების მხარის მოთხოვნით ნაწილობრივ დაიხურა, მათ მიზეზად საიდუმლო მასალების გაჟღერება მოიყვანეს. პროკურატურის მოთხოვნას არ დაეთანხმა დაცვის მხარე, მათ საჯარო სხდომა მოითხოვეს.
მოსამართლის გადაწყვეტილებით, პროკურატურის მოთხოვნა წინასწარი გამოძიების ვადის გაგრძელებაზე დაკმაყოფილდა და საქმეზე წინასასამართლო სხდომა 5 მაისამდე გადაიდო.
დეკანოზი გიორგი მამალაძე, მკვლელობის მომზადების ბრალდებით 10 თებერვალს, თბილისის საერთაშორისო აეროპორტში დააკავეს. მისი ბარგიდან ამოღეს მომწამვლელი ნივთიერება ციანიდი. იგი ბერლინში, პატრიარქთან მიფრინავდა.
