უფრო მეტად გვიღირს თითოეული ადამიანის ჯანმრთელობა და სიცოცხლე, ვიდრე ორი-სამი დამწვარი მანქანა, - ამის შესახებ შს მინისტრმა ხულოს მოსახლეობასთან შეხვედრაზე, ბათუმის მოვლენებზე საუბრისას განაცხადა.
”ჩვენ არ გამოვედით, სანამ ბოლომდე არ დაიწმინდა აქცია. ჩვენ გვქონდა ოპერატიული ინფორმაცია გარედან, რომ ვინც ცნობისმოყვარეობის მიზნით იყო მოსული, ეს ადამიანები წავიდოდნენ და დაიშლებოდნენ. როგორც კი ადგილზე დარჩნენ კრიმინალები, მერე უკვე ჩვენ ჩავერიეთ. უფრო მეტად გვიღირს თითოეული ადამიანის ჯანმრთელობა და სიცოცხლე, ვიდრე ორი-სამი დამწვარი მანქანა. იმ შეურაცხყოფასაც ავიტანთ, რაც მოგვაყენეს. ჩვენ გვაქვს თმენის ვალდებულება და ჩვენ ამას მაქსიმალურად ვიჩენთ. მაქსიმუმი გავაკეთეთ იმისა, რაც შეგვეძლო - მოთმინებას ვგულისხმობ. დილისკენ, როდესაც უკვე შეიმჩნეოდა, რომ კრიმინალების მეტი იქ არავინ აღარ იყო, ჩვენ გამოვედით. თუ დაზიანებულია ვინმე, ისევ პოლიციის თანამშრომლები არიან დაზიანებული. ეს იყო წმინდა წყლის პროვოკაცია. ჩვენს თავს იმის უფლებას ვერ მივცემდით, რომ გამოგვეყენებინა უხეში ძალა. შეიძლება მომხდარიყო ჭყლეტა და 100%-ით გეუბნებით, რომ იქ ადამიანები ძალიან სერიოზულად დაზარალდებოდნენ”, - განაცხადა გიორგი მღებრიშვილმა.
შს მინისტრის თქმით, პირადად იძლევა იმის პირობას, რომ სიმშვიდე არამარტო აჭარაში, არამედ მთელს საქართველოში იქნება.
ბათუმში 11 მარტს, პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც თვითმხილველებსა და სამართალდამცველებს შორის სიტყვიერი და ფიზიკური დაპირისპირება მოჰყვა.
აღნიშნული ინცინდენტის შემდეგ, აჭარის პოლიციის მთავარ სამმართველოსთან აქცია გაიმართა, რომელიც გვიან ღამით, არეულობაში გადაიზარდა. აქციის მონაწილეებმა დაწვეს ავტომობილები, დააზიანეს ინფრასტრუქტურა.
არეულობის შედეგად, 33 ადამიანი, მათ შორის, 15 პოლიციელი დაშავდა.
