ევროპის ერთიანი შეიარაღებული ძალების შექმნის საკითხის დღის წესრიგში კიდევ ერთხელ რომ დადგებოდა, ევროკომისიის თავმჯდომარე ჯერ კიდევ რამდენიმე თვის წინ პროგნოზირებდა. მთავარ არგუმენტად მას ამერიკის პრეზიდენტობის კანდიდატის, დონალდ ტრამპის ნატოსთან დამოკიდებულება მოჰყავდა. წინასაარჩევნო კამპანიისას ამერიკის მომავალმა პრეზიდენტმა არაერთგზის განაცხადა, რომ ნატოს წევრობა შეერთებულ შტატებს ძალიან ძვირი უჯდება და რომ ევროპამ საკუთარი უსაფრთხოებისთვის მეტი უნდა გაიღოს. იუნკერი ევროპული არმიის შექმნის პერსპექტივას ასე აფასებდა:
ევროპის თავდაცვითი კავშირის შექმნის საკითხს ჩვენ მეტი სერიოზულობით უნდა მივუდგეთ. ვფიქრობ, ევროპული არმიის შექმნა გარდაუვალია. ეს ის მუსიკაა, რომელიც უკვე ჟღერს, თუმცა სამწუხაროდ, ის ევროპაში ჯერ არ ესმით.
ცუდ მსმენელებს შორის იყვნენ გერმანია, საფრანგეთი და ბრიტანეთი, რომლებიც ევროპის ახალი სამხედრო სტრუქტურის შექმნის ინიციატივას მხარს არ უჭერდნენ. მთავარი მიზეზი კი ის იყო, რომ ევროკავშირის ბიუჯეტს გაერთიანებული შეიარაღებული ძალების შექმნა, სულ მცირე, 4 მილიარდი დაუჯდებოდა.
შემდეგ იყო ბრექსიტი. მას შემდეგ, რაც ბრიტანეთის მოსახლეობამ ევროკავშირიდან ქვეყნის გასვლას დაუჭირა მხარი, ევროპის თავდაცვის გაძლიერების საკითხი დღის წესრიგში კიდევ ერთხელ დადგა. გერმანიის კანცლერმა და საფრანგეთის პრეზიდენტმა თავდაცვის უწყებებს კონკრეტული გეგმის შემუშავება დაავალეს, ბრატისლავას სამიტზე კი ევროკავშირის წევრი ქვეყნები მომავალი წლის ივნისამდე ახალი თავდაცვითი სტრატეგიის შემუშავებაზე შეთანხმდნენ.
ამერიკის საპრეზიდენტო არჩევნებში დონალდ ტრამპის გამარჯვებამ მოვლენები კიდევ უფრო დააჩქარა. ბრიუსელში ევროკავშირის თავდაცვის მინისტრები უსაფრთხოებისა და თავდაცვის ახალ გეგმაზე შეთანხმდნენ, თუმცა როგორც ევროკავშირის საგარეო საქმეთა კოორდინატორი აცხადებს, ერთიანი არმიის შექმნაზესაუბარი არ არის.
საუბარი არ არის ევროპის არმიის შექმნაზე. ჩვენს გეგმებში არც ერთიანი შტაბის შექმნა შედის და არც ტერიტორიული თავდაცვა. ეს ნატოს ფუნქციაა. ჩვენ ვართ მოკავშირეები და თავდაცვის სფეროში განსაზღვრული ვალდებულებები გვაქვს,-ამბობს ფედერიკა მოგერინი.
ის, რომ ევროკავშირი ნატოს საპირწონე ახალი სამხედრო ორგანიზაციის შექმნას არ აპირებს, მინისტერიალის მონაწილეებმაც დაადასტურეს. ბრიტანეთის თავდაცვის მინისტრის, მაიკლ ფელონის თქმით, ნაცვლად იმისა, რომ ევროპულ არმიაზე იოცნებოს, ევროკავშირმა ნატოს დაფინანსება უნდა გაზარდოს, რასაც ბრიტანეთი უკვე დიდი ხანია, აკეთებს.
ახალი თავდაცვითი გეგმა სამ ძირითად პრიორიტეტზეა ორიენტირებული, კერძოდ კი იმაზე, რომ ევროკავშირმა შეძლოს კრიზისულ სიტუაციებზე უფრო სწრაფი და გაბედული რეაგირება. ის ასევე ითვალისწინებს ევროკავშირის პარტნიორების უსაფრთხოებისა და თავდაცვის შესაძლებლობების გაუმჯობესებას და ევროკავშირის შესაძლებლობის გაძლიერებას, დაიცვას ევროპის მოქალაქეები.
ნატოს ლიდერი ქვეყნის პრეზიდენტად ალიანსის წინააღმდეგ განწყობილი კანდიდატის არჩევამ ევროკავშირი საფუძვლიანად შეაშფოთა, თუმცა ერთიანი არმიის შექმნის იდეა ჯერჯერობით იდეადვე დარჩება. როგორც ცნობილი დიპლომატი, ამერიკაში ბრიტანეთის ელჩი კრისტოფ მაიერი აცხადებს, „ევროკავშირს საკუთარი ჯარი მაშინ ეყოლება, თუ გოჭები ფრენას დაიწყებენ.“
