შავნაბადას პრეზიდენტის რეზიდენციის უსაფრთხოების სამსახურის ოფიცერი ადასტურებს ინფორმაციას, რომ 2006 წელს დათა ახალაიას დაუგეგმავ სტუმრობას ჰქონდა ადგილი. მოწმე გივი აფციაური გირგვლიანის საქმის იმ ეპიზოდზე დაიკითხა, რომელზეც მიხეილ სააკაშვილს უფლებამოსილების ბოროტად გამოყენების ბრალი აქვს წაყენებული.
პრეზიდენციის უსაფრთხოების სამსახურის თანამშრომელმა მოყვა, რომ ახალაიას მისვლა იყო დაუგეგმავი ვიზიტი, რადგან მათ წინასწარ იცოდნენ პირები, რომლებიც რეზიდენციაში უნდა შეეშვათ.
“2006 წლის გაზაფხულზე იყო ვიზიტი, მანქანა მოვიდა გამშვებ პუნქტთან. მძღოლმა მანქანა ჩაწია და მითხრა, რომ დათა ახალაიაა. მე გავაჩერე და დავუკავშირდი ოპერატიულ მორიგეს, მივიღე დასტური შეშვებაზე. ვკითხე თუ გაქვთ იარაღითქო და გადმომაწოდეს კალაშნიკოვის ტიპის იარაღი, რომელიც შევინახე საგუშაგოზე. ის მოსული იყო მუქი ფერის ჯიპის მარკის ავტომობილით”, - განაცხადა მოწმემ.
კითხვაზე ამის შემდეგ ან მანამდე ყოფილა თუ არა დათა ახალაია რეზიდენციაში მისული, უსაფრთხოების სამსახურის ოფიცერმა განაცხადა, რომ მისი იქ ყოფნის დროს არ მისულა.
პროკურატურა აცხადებს, რომ სწორედ ამ შეხვედრაზე მოხდა შეთანხმება ახალაიასა და სააკაშვილს შორის გირგვლიანის მკვლელობაში ბრალდებული პირების საკითხზე.
პროკურატურა აცხადებს, რომ 2008 წლის 24 ნოემბერს საქართველოს იმჟამინდელმა პრეზიდენტმა მიხეილ სააკაშვილმა, ბოროტად გამოიყენა სამსახურებრივი უფლებამოსილება, დავით ახალაიასთვის წინასწარ მიცემული უკანონო დაპირების შესაბამისად, შეწყალების კომისიის გვერდის ავლით, შეიწყალა და საპატიმრო სასჯელები გაუნახევრა მსჯავრდებულებს გერონტი ალანიას, ალექსანდრე ღაჭავას, მიხეილ ბიბილურიძესა და ავთანდილ აფციაურს, რის შემდეგაც მათ მიმართ შესაძლებელი გახდა ვადამდე პირობით განთავისუფლების სამართლებრივი მექანიზმის გამოყენება და ისინი განთავისუფლდნენ სასჯელის მოხდისგან და პატიმრებიდან 3 წლისა და 9 თვის შემდეგ.
