საკონსტიტუციო სასამართლოს პლენუმი დღეს „პატრიოტთა ალიანსის“ სარჩელის არსებით განხილვას იწყებს. პარტია მიიჩნევს, რომ საპარლამენტო არჩევნებში ბარიერგადალახულ პარტიებზე მანდატების გადანაწილების მოქმედი პრინციპი კონსტიტუციასთან წინააღმდეგობაში მოდის. ეს იქნება რიგით მეორე საქმე, რომელსაც პლენუმის ახალი შემადგენლობა განიხილავს. გუშინ ყოფილი მოსამართლეების სარჩელის არსებითი განხილვა დასრულდა, რომელშიც მოსარჩელე მხარე საერთო სასამართლოების შესახებ ორგანული კანონის იმ პუნქტების ანტიკონსტიტუციურად ცნობას ითხოვს, რომელიც მოსამართლეთა შერჩევა-დანიშვნას არეგულირებს. საქმე საკონსტიტუციო სასამართლოს პლენუმის წინა შემადგენლობამ არსებითად განიხილა და გადაწყვეტილების მისაღებად გავიდა, თუმცა ახლად დანიშნულმა მოსამართლეებმა საქმის ხელახალი განხილვა მოითხოვეს. ხელმეორე არსებითი განხილვის დასრულება პლენუმმა ერთ დღეში მოახერხა და გადაწყვეტილების მისაღებად სათათბირო ოთახში გავიდა, თუმცა როდის გამოცხადდება გადაწყვეტილება, უცნობია.
