ზვარეში, ჩინური კომპანიის ერთ-ერთი თანამშრომლის თქმით, ქართველებსა და ჩინელებს შორის მომხდარი ინციდენტისას რამდენიმე ჩინელიც დაშავდა, თუმცა უმნიშვნელოდ.
“დაახლოებით ოთხი ჩინელ თანამშრომელს ხელის და ფეხის უმნიშვნელო ტრავმა ჰქონდა და როგორც ვიცი ისინი პოლიციამ დაკითხვაზე წაიყვანა”, - განაცხდა ჩინური კომპანიის დაცვის თანამშრომელმა გიორგი ლუტიძემ.
ხარაგაულის რაიონის სოფელ ზვარეში რკინიგზის ლიანდაგის მშენებლობაზე დასაქმებული რამდენიმე ქართველი მუშა ჩინური კომპანიის წარმომადგენლებმა სცემეს. ზვარეში ინციდენტისას დაშავებული ოთხი მუშა ზესტაფონის საავადმყოფოშია გადაყვანილი.
სოფელ ზვარეში ოთხი მუშის ცემის ფაქტზე შინაგან საქმეთა სამინისტრომ გამოძიება დაიწყო. საქმე 125-ე მუხლით არის აღძრული, რაც ცემას გულისხმობს. პროფკავშირები საქმის გადაკვალიფიცირებას მოითხოვენ. მათი ინფორმაციით, გუშინ საღამოს სოფლის მოსახლეობა ტყიდან ეზიდებოდა შეშას. ჩინურმა კომპანიამ ჩათვალა, რომ ეს იყო მათი საკუთრება, მათი შეშა და სოფლის მოსახლეობას მიაყენა ფიზიკური შეურაცხყოფა, ქართველი მუშები გამოესარჩლნენ სოფლის მოსახლეობას და შეეცადნენ დაეცვათ ისინი, რასაც მათი დაზიანება მოჰყვა.
