შსს-ს ინფორმაციით, ლანჩხუთის რაიონის აცანის ეკლესიის წინამძღვარმა გაბრიელ კახელიშვილმა პოლიციის ავტომობილში თვითდაზიანებები მიიყენა.
შსს-ს განმარტებით, მამა გაბრიელი მანქანით ნასვამ მდგომარეობაში, გადაჭარბებული სიჩქარით მოძრაობდა. პოლიციამ მას სახლამდე მიყვანა შესთავაზა, რაზეც სამართალდამცავებს სიტყვიერი შეურაცხყოფა მიაყენა.
სამართალდამცველებმა ის პოლიციელებისადმი დაუმორჩილებლობისთვის საპატრულო პოლიციის მანქანით ოზურგეთის განყოფილებაში გადაიყვანეს.
შს სამინისტროს განცხადებით, მღვდელმა თვითდაზიანებები სწორედ ამ დროს მიიყენა, რისი ამსახველი კადრებიც სამართალდამცველების სამკერდე კამერით არის გადაღებული.
შს სამინისტროში აცხადებენ, რომ ეთიკური ნორმებიდან გამომდინარე, მამა გაბრიელის დაკავებისა და თვითდაზიანებების მიყენების დროს გადაღებულ ვიდეოკადრებს არ გაავრცელებენ.
აცანის ეკლესიის წინამძღვრის სასტიკად ცემის შესახებ ინფორმაცია „რუსთავი 2“- მა გაავრცელა.
ტელეკომპანიის ცნობით, ცნობით, მამა გაბრიელ კახელიშვილი აცხადებს, რომ მას სამართალდამცველები გაუსწორდნენ.
„კურიერთან“ საუბრისას მღვდელი ყვება, რომ ის ნასვამ მდგომარეობაში მართავდა ავტომობილს, რა დროსაც ლანჩხუთში პოლიციამ გააჩერა. მისი თქმით, ავტომობილი „ქართული ოცნების“ ოფისთან გააჩერა და სამართალდამცველებს ბოდიში მოუხადა. როგორც აცანის ეკლესიის წინამძღვარი ყვება, ამის შემდეგ პოლიციამ მას ხელბორკილები დაადო, მანქანაში ჩასვა და სასტიკად სცემა.
ამ დროისთვის, მამა გაბრიელ კახელიშვილი ოზურგეთის ერთ-ერთ კლინიკაში იმყოფება.
