ეროსი კიწმარიშვილის ძმამ, ზურაბ კიწმარიშვილმა და ადვოკატებმა ერთობლივ ბრიფინგზე გამოძიების მიმართ არსებულ კითხვებზე ისაუბრეს.
ადვოკატი გაგი მოსიაშვილი მიიჩნევს, რომ აუცილებელია გასაჯაროვდეს ეროსი კიწმარიშვილის ქალაქში გადაადგილების მარშრუტი.
ადვოკატების განცხადებით, არაერთი მოთხოვნის მიუხედავად, არ გასაჯაროებულა კიწმარიშვილის სოციალური ქსელით მიმოწერა, ხოლო ექვსი თვის შემდეგ, როდესაც გამოძიება დაინტერესდა, აღმოჩნდა, რომ ეროსის გარკვეული მიმოწერა წაშლილი იყო. მათ შორის მის ყოფილ მეგობართან ალექსანდრე კარპოვთან. კიწმარიშვილის ძმა აცხადებს, რომ ეს იყო პირადი მეგობრული სახის მიმოწერა.
გაგი მოსიაშვილის განცხადებით, ირკვევა, რომ ეროსი კიწმარიშვილს გარდაცვალებამდე ქონდა მიყენებული დაზიანებები თავის არეში და ხელის მტევანზე. ასევე იარაღზე აღმოჩენილი ანაბეჭდები საეჭვოდ მიაჩნიათ ადვოკატებს.
მისივე თქმით, ექსპერიზა გამოთქვამს ვარაუდს, რომ იარაღზე ორი პირის კვალია აღმოჩენილი. ერთ-ერთზე არაა გამორიცხული, რომ კიწმარიშვილის დნმ ყოფილიყო.
ზურაბ კიწმარიშვილს ეჭვი აქვს, რომ ავტომობილი იყო გადაადგილებული, იმ პერიოდში, როდესაც კიწმარიშვილი უკვე გარდაცვლილი იპოვეს.
ადვოკატების თქმით, დღემდე არ არის დადგენილი იმ კავკასიური აღნაგობის პირის ვინაობა, რომელიც კიწმარიშვილის სახლთან ფიქსირდება.
მთავარმა პროკურატურამ ეროსი კიწმარიშვილის თვითმკვლელობამდე მიყვანის ფაქტზე დაასრულა გამოძიება. ამის შესახებ საგამოძიებო ორგანის მიერ ოფიციალურად გუშინ გახდა ცნობილი.
პროკურატურაში განაცხადეს, რომ ეროსი კიწმარიშვილმა თავი მოიკლა და სისხლის სამართლის საქმე შეწყვეტილია.
