მეუღლისა და შვილის მკვლელობაში ბრალდებულმა მაგდა პაპიძემ სასამართლო პროცესზე განაცხადა, რომ მის შვილს ჯანმრთელობის პრობლემები დაბადებიდანვე ჰქონდა და მას გვერდიდან არ მოსცილებია. ,,მე და თორნიკეს უბრალო დედა-შვილობა არ გვქონია, - აღნიშნა ბრალდებულმა და დასძინა, რომ მის შვილს ხშირად სჭირდებოდა მედიკამენტები, რის დადასტურებაც შესაძლებელია მის საცხოვრებელ სახლში მისვლით.
პაპიძემ განმარტება გააკეთა პროცესზე წარმოდგენილ ფოტოებზეც, რომელიც პროკურორის მიერ ,,გამომწვევად“ შეფასდა.
„თუ ასეთი ფოტო ჩემს სოციალურ ქსელში არის ორი და ორივე ჩემი მეუღლის გადაღებულია, მე ეს ორივე ფოტო მჭირდებოდა სამსახურისთვის, რადგან მე ვმუშაობდი პიარში და ასეთი ფოტოები მჭირდებოდა“, - განაცხადა მაგდა პაპიძემ.
რაც შეეხება მეუღლეს, მან განაცხადა, რომ ომარ ქაფიაშვილს პათოლოგიური სიმთვრალე ნამდვილად ქონდა, თუმცა მის მიმართ ეს არასდროს გამოუვლენია. მისი თქმით, ომარ ქაფიაშვილის ,,მომრევი არ ეგულებოდა“, რაც საკუთარი თვალით აქვს ნანახი ჩხუბში.
პაპიძემ განმარტება უროს შეძნაზეც გააკეთა და აღნიშნა, რომ მისი ყიდვა მეუღლემ სათავსოს შესაკეთებლად დაავალა.
ბრალდებულმა ასევე, ისაუბრა დაკავების შემდეგ მასზე განხორციელებულ ძალადობაზე და აღნიშნა, რომ არ იცის მათი ვინაობა, თუმცა მოძალადეების ამოცნობა შეუძლია.
მაგდა პაპიძის თქმით, მას ოთარ ბერძენიშვილთან დიდი ხნის მეგობრობა აკავშირებს და როდესაც მისი დაკითხვა მოხდება ისიც დაადასტურებს, რომ უბრალოდ მეგობრები იყვნენ.
