აზერბაიჯანი-საქართველო-რუმინეთის ინტერკონექტორის (AGRI) პროექტი "ნაბუქოს" თანმდევი პროექტია. ამის შესახებ საქართველოს ენერგეტიკის მინისტრმა ალექსანდრე ხეთაგურმა განაცხადა.
მისი თქმით, ეს არ არის "ნაბუქოს" ალტერნატიული პროექტი და მისი განხორციელება ენერგოუსაფრთხოებას გააძლიერებს.
ხეთაგურის განმარტებით, აღნიშნული პროექტი, რომელიც საქართველოს გავლით რუმინეთში აზერბაიჯანული გაზის ტრანსპორტირებას ითვალისწინებს, აზერბაიჯანს წყაროების დივერსიფიცირების, ხოლო საქართველოს სატრანზიტო პოტენციალის უფრო ფართოდ გამოყენების საშუალებას აძლევს.
"შესაბამისად, ჩვენ გავაძლიერებთ, იმ მიმართულებით მუშაობას, რომ რაც შეიძლება მეტი გაზის ტრანზიტი მოვახდინოთ. სწორედ ამ პროექტის ფარგლებში, მას შემდეგ რაც ტექნიკურ-ეკონომიკური დასაბუთება დასრულდება, გვეცოდინება რა მოცულობის გაზის ტრანსპორტირება შეიძლება მოხდეს საქართველოს გავლით და რა მოცულობა შეიძლება დარჩეს საქართველოს ტრანზიტის საფასურად", - განაცხადა ხეთაგურმა.
"გათხევადებული გაზის და მისი ტრანსპორტირების სფეროში თანამშრომლობის შესახებ~ მემორანდუმს ხელი ბუქარესტში 13 აპრილს მოეწერა. იგი საქართველოში გაზის გამათხევადებელი, ხოლო რუმინეთში რეგაზიფიკაციის ტერმინალების მშენებლობას ითვალისწინებს.
აზერბაიჯანი-საქართველო-რუმინეთის ინტერკონექტორის (AGRI) პროექტის ფარგლებში ბუქარესტში დაახლოებით ერთ თვის განმავლობაში ერთობლივი კომპანია დაფუძნდება, რომელშიც საქართველოს, აზერბაიაჯანსა და რუმინეთს ერთნაირი ოდენობის წილი ექნებათ. კომპანია პროექტის ტექნიკურ-ეკონომიკურ დასაბუთებას მოამზადებს, ხოლო შემდეგ კი, მისი განხორციელებისთვის თანხებს მოიძიებს. პროექტის სავარაუდო ღირებულება 5-6 მლრდ აშშ დოლარს შეადგენს.
