პარლამენტში „საარჩევნო კოდექსში“ შესატან ცვლილებებზე მსჯელობენ. დღევანდელ რიგგარეშე სხდომაზე ცვლილებების პროექტი ვიცე-სპიკერმა, ზვიად ძიძიგურმა წარადგინა.
ამ წუთებში, დეპუტატები საკითხის თაობაზე კითხვებს სვამენ, რომელიც ძირითადად საარჩევნო ოლქების დაყოფას და მაჟორიტარი დეპუტატების არჩევისთვის 50 %-იანი ბარიერის დაწესებას ეხება.
ცვლილებების თანახმად, უმრავლესობის მიერ წარდგენილი პროექტით, თბილისში, 10 მაჟორიტარული ოლქის ნაცვლად, 18 მაჟორიტარული ოლქი შეიქმნება. ცვლილებებით, საქართველოს დანარჩენ რაიონებში, მუნიციპალიტეტების გაერთიანების ან პირიქით, გაყოფის გზით, 42 მაჟორიტარული საარჩევნო ოლქი შეიქმნება.
ამას გარდა, პროექტით, 13 მუნიციპალიტეტის - საგარეჯოს, გურჯაანის, ახმეტის, ხაშურის, ახალქალაქის, ნინოწმინდის, მესტიის, საჩხერის, ჭიათურის, წყალტუბოს, სენაკის, ზუგდიდისა და ფოთის მუნიციპალიტეტების საზღვრები თანხვედრაში მაჟორიტარული საარჩევნო ოლქის საზღვრებთან იქნება.
პროექტის ავტორთა განმარტებით, ცესკო საარჩევნო ოლქის საზღვრებს დაადგენს და დააზუსტებს არა განკარგულებით, რომელიც ცესკოს ინდივიდუალურ ადმინისტრაციულ-სამართლებრივ აქტს წარმოადგენს, არამედ - დადგენილებით, რომელიც კანონქვემდებარე ნორმატიულ აქტს წარმოადგენს.
