არჩევნებში სავალდებულო მონაწილეობა გაყალბების საფრთხეს შეიცავს, - ასე აფასებენ ექსპერტები ”ჯი-ეიჩ-ენთან” საუბარში არჩევნებში სავალდებულო მონაწილეობის შესაძლო დაწესებასთან დაკავშირებით.
მათი თქმით, საქართველოს ტიპის ქვეყნისთვის, რომელთა მოსახლეობის დიდი ნაწილი ქვეყნიდან არალეგალურად არის გასული, ეს არჩევნების გაყალბების საფრთხესაც შეიცავს, რადგან ისინი არჩევნებზე მაინც არ მივლენ და ხელისუფლება მათი ხმების გამოყენებას ადვილად მოახერხებს.
არჩევნებში სავალდებულო მონაწილეობის წესი 35 ქვეყანაში მოქმედებს და მათ შორის არის დემოკრატიული ქვეყნებიც. სწორედ ამ ფაქტორს იყენებენ ამ საკითხის მხარდამჭერები სავალდებულობის ლობირებისას.
ცნობითვის, საქართველოს ხელისუფლება გეგმავს, რომ არჩევნებში მონაწილეობა სავალდებულო გახადოს, ”ჯი-ეიჩ-ენის” ინფორმაციით, მმართველმა გუნდში ამის შესახებ გადაწყვეტილება ორი დღის წინ გამართულ შეხვედრაზე გაცხადდა, რომელიც „ქართული ოცნების“ ცენტრალურ ოფისში გაიმართა.
შეხვედრის შემდეგ მმართველი გუნდის წევრებმა განაცხადეს, რომ საარჩევნო საკითხებზე იმსჯელეს, მაგრამ საკითხები არ დაუკონკრეტებიათ და აქცენტი მხოლოდ მაჟორიტარული სისტემის შენარჩუნებაზე გაკეთდა.
არჩევნებში სავალდებულო მონაწილეობის საკითხი „პატრიოტთა ალიანსის“ ლიდერის მიერ მოთოოვნილი იმ 3 საკითხიდან ერთ-ერთია, რომლის შესრულებაც ინაშვილმა შიმშილობის შეწყვეტის სანაცვლოდ მოითხოვა.
ამ წესის დანერგვისთვის კი კონსტიტუციაშია ცვლილება შესატანი. კერძოდ, კონსტიტუციის 28-ე მუხლში უნდა ჩაიწეროს, რომ საქართველოს მოქალაქეები ვალდებულნი არიან, არჩევნებში მონაწილეობა მიიღონ.
საკონსტიტიციო ცვლილების პროცედურა დღეს ორ სესიაზე განხილვას ითვალისწინებს და, თუკი დეკემბრის ბოლომდე ეს ინიციატივა დარეგისტრირდება, რაც სრულიად მოსწრებადია, გაზაფხულიდან არჩევნებამდე, რომელიც ოქტომბერში უნდა გაიმართოს, 6 თვით ადრე ცვლილების დამტკიცების შემთხვევაში ნორმა 2016 წლის საპარლამენტო არჩევნებზე მოქმედი იქნება.
