აუდიტის სამსახურის დასკვნის თანახმად, 2011-2013 წლებში, დევნილთა გრძელვადიანი განსახლების პროცესში სამინისტროში ხარვეზები გამოვლინდა.
პარლამენტში შესული დოკუმენტის მიხედვით, ხუთ ოჯახს, რომლებიც ერთი სარეგისტრაციო ნომრის ქვეშ იმყოფებოდნენ, საკუთრებაში ერთზე მეტი საცხოვრებელი ფართი გადაეცა. ასევე, გამოვლინდა ექვსი შემთხვევა, როდესაც ერთ ოჯახზე გაიცა როგორც ერთჯერადი კომპენსაცია, ასევე, განხორციელდა საცხოვრებელი ბინის დაკანონება.
„13 ოჯახზე ზედმეტად გაცემულმა კომპენსაციის თანხამ - 130,000 აშშ დოლარი შეადგინა. საცხოვრებელი ფართები დაკანონებული ოთხ ისეთ ოჯახს ჰქონდა, რომლებსაც დევნილის სტატუსი შეუწყდათ“, - ნათქვამია დასკვნაში, სადაც საუბარია უწყების მხრიდან საწვავის არამიზნობრივ ხარჯვაზეც.
კერძოდ, დასკვნის თანახმად, არ დასტურდება სახელმწიფო ბიუჯეტიდან გამოყოფილი ასიგნებებიდან გახარჯული შესყიდული საწვავის მიზნობრიობა.
„ვერ დასტურდება 130.4 ათასი ლარის ღირებულების საწვავის ხარჯის მიზნობრიობა. ხარჯებში ჩამოწერილი 59.8 ათასი ლარის ბენზინის საწვავის მიღება სამინისტროს თანამშრომელთა ხელმოწერებით არ დასტურდება. ასევე, ზედმეტად ხარჯად არის აღიარებული 500 ლიტრი საწვავი. 2011-2012 წლებში, საწვავი აღიარებულია ხარჯად და ჩამოწერილია იმ ავტომანქანებზე, რომელიც არ იყო სამინისტროს საკუთრებაში/სხვა სახით სარგებლობაში. შესაბამისად, არ იყო აღრიცხული ფინანსურ ანგარიშგებაშიც. აღნიშნულ ავტოსატრანსპორტო საშუალებების მიერ გახარჯულია 61.9 ათასი ლარის საწვავი“, - ნათქვამია დოკუმენტში.
არაეფექტურად არის მიჩნეული სამშენებლო-სარეაბილატაციო სამუშაოების განხორციელების მიზნით გაწეული ხარჯებიც. კერძოდ, სამინისტროს მიერ სამშენებლო-სარეაბილატაციო სამუშაოების განხორციელების მიზნით, 2013 წელს, გაფორმებული ორი ხელშეკრულების ფარგლებში, უხარისხო სამუშაოები შესრულდა. აღნიშნულ სარეკონსტრუქციო-სამონტაჟო მომსახურებაზე არაეფექტიანად გაწეულმა ხარჯმა 1,920.0 ათასი ლარი შეადგინა.
