საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის სოზარ სუბარის განცხადებით, დევნილთა შემწეობები მთავრობისთვის ერთ-ერთი უმთავრესი პრიორიტეტია და შესაბამისად, მის უწყებას უშუალოდ არცერთი თეთრი არ აკლდება.
მინისტრის განმარტებით, მოხდა უწყების ბიუჯეტის კორექტირება რეგიონული ოფისების შეძენასა და გარემონტებაზე.
,,ჩვენ გავაკეთეთ გარკვეული კორექტირება, ვაპირებდით, რომ ახალი რეგიონული ოფისები გვქონოდა. ეს არის ოფისი ქვემო ქართლში, რუსთავსა და ზუგდიდში, სადაც უმძიმესი პირობებია, თუმცა, უარი ვთქვით ოფისების შეძენასა და გარემონტებაზე და ეს თანხა დევნილთა სახლებით დასაკმაყოფილებლად იქნება. უშუალოდ სამინისტროს არცერთი თეთრი არ აკლდება, რადგან დევნილთა შემწეობები მთავრობისთვის ერთ-ერთი უმთავრესი პრიორიტეტია,“ - აღნიშნა მინისტრმა.
საქართველოს მთავრობა დღევანდელ სხდომაზე სახელმწიფო ბიუჯეტის კორექტირებულ ვარიანტს განიხილავს. ბიუჯეტის პროექტს მთავრობის სხდომაზე მინისტრთა კაბინეტის წევრებს ფინანსთა მინისტრი ნოდარ ხადური წარუდგენს.
ბიუჯეტის საბოლოო ვარიანტის წარდგენა პრემიერ-მინისტრმა ირაკლი ღარიბაშვილმა ნოდარ ხადურს გასულ კვირაში დაავალა.
მთავრობის ადმინისტრაციაში მინისტრთა კაბინეტის სხდომა 09:00 საათზე დაიწყო.
მინისტრთა კაბინეტის წევრები დღის წესრიგით გათვალისწინებულ 24 საკითხს განიხილავენ, მათ შორის ერთი საიდუმლოა.
