პროკრედიტ ბანკის გენერალურმა დირექტორმა ასმუს როტნემ და “კავკასიის ბუნების ფონდის” აღმასრულებელმა დირექტორმა დევიდ მორისონმა ქველმოქმედების ხელშეკრულებას მოაწერეს ხელი. დოკუმენტის თანახმად პროკრედიტ ბანკმა 20 000 ლარი გამოყო ალგეთის ეროვნული პარკისთვის. გამოყოფილი თანხა მთლიანად მოხმარდება ეროვნულ პარკში ინფრასტრუქტურის გაუმჯობესებას. ეს თანხა არ არის საკმარისი პარკის სრული რეაბილიტაციისათვის და დანარჩენი სახსრების მოძიებას თავად ფონდი განახორციელებს. ქველმოქმედების ფარგლებში დაიგეგმება პროკრედიტ ბანკის თანამშრომლების ვიზიტი ალგეთის ეროვნულ პარკში, სადაც ისინი მოინახულებენ ამ ულამაზეს ადგილს, მდიდარს ფლორითა და ფაუნით, ალგეთის ეროვნული პარკის მიმდებარე ტერიტორიაზე აღმოჩენილ არქეოლოგიურ ძეგლებს და ამავე დროს საკუთარ წვლილს შეიტანენ მისი უკეთ მოწყობის საკითხში. ტრადიციისამებრ, ვიზიტის წინ, „კავკასიის ბუნების ფონდი“ პროკრედიტ ბანკის თანამშრომლებისთვის სპეციალურ დავალებებს მოამზადებს, რომელსაც თანამშრომლები ეროვნულ პარკში ვიზიტისას შეასრულებენ.
მოგეხსენებათ, პროკრედიტ ბანკისა და საქველმოქმედო ფონდ “კავკასიის ბუნების ფონდის” თანამშრომლობა უკვე რამდენიმე წელიწადია წარმატებით ხორციელდება. ბანკი ყოველ წელს გარკვეულ თანხას რიცხავს გრანტის სახით ჩვენი დაცული ტერიტორიების ინფრასტრუქტურის გაუმჯობესების მიზნით. 5 წლიანი თანამშრომლობის ფარგლებში, პროკრედიტ ბანკმა თანხები გამოყო ლაგოდეხის დაცული ტერიტორიების, ვაშლოვანის ნაკრძალის და ახალა უკვე ალგეთის ეროვნული პარკისთვის. საქართველოს ბუნების დაცვის მიზნით მსგავს საქველმოქმედო საქმიანობაში ჩართვას ბანკი მომავალშიც განაგრძობს.
