კომპანია TAM GEO-ში არსებული დაპირისპირების გამო ბათუმში Babillon Tower-ის მშენებლობა დროებით შეჩერდა. როგორც აჭარის მთავრობის მეთაურმა არჩილ ხაბაძემ დღეს ჟურნალისტებთან საუბრისას განმარტა, Babillon Tower-ის მშენებლობის შეჩერების მიზეზი კომპანიის მეწილეებს შორის არსებული კონფლიქტი და გაუგებრობაა.
საჯარო რეესტრის ეროვნული სააგენტოს ინფორმაცით, კი კომპანია TAM GEO-ს 4 მეწილე ყავს: თურქეთის მოქალაქები ომერ ილქნური და ისმაილ
ჰაქქი აიჰანი კომპანის 1-1 %-იანს წილს ფლობენ. 3 %-იანი წილის მფლობელია ასევე, თურქეთის მოქალაქე ირფან კოვუკი. კომპანის მსხვილ მეწილეებად კი ასევე თურქეთის მოქალაქეების ბაირამ ალი ბაირამოღლუ (50 %-ი) და მეჰმეთ მეთეჰან ბერქთაში (45 %) ფიქსირდებიან.
როგორც არჩილ ხაბაძემ განმარტა, კომპანის ორი ძირითადი დამფუძნებელი ჰყავს.
”მათ შორის არის გაურკვევლობა, პრობლემა. მე როგორც ვიცი, 15 ივნისამდე უნდა გადაწყდეს, მათ შორის თუ რომელი გაყიდის წილს და გავა საქმიდან. ეს ყველაფერი მათ დაფიქსირებული აქვთ, მოლაპარაკებები შემდგარია და 15 ივნისიდან გადაწყდება თუ რომლის საკუთრება დარჩება”,- აღნიშნა არჩილ ხაბაძემ.
აჭარის მთავრობის მეთაური განმარტავს, რომ დამფუძნებლებს შორის არსებული კონფლიაქტის ამოწურვის შემდეგ, მშენებლობა გაგრძელდება.
ხაბაძის ინფორმაციას კატეგორიულად უარყოფენ კომპანია TAM GEO-ში. ტელეკომპანია ”ტვ25-ს” კომპანიაში განუმარტეს, რომ მშენებლობის შეჩერება პროექტის კორექტირებას უკავშირდება. შპს TAM GEO-ს გაყიდვების მენეჯერი ნინო ლიკუჩოვა ამბობს, რომ სპეციალისტები პროექტზე მუშაობას ერთ კვირაში დაასრულებენ, რის შემდეგაც მერიის არქიტექტურის სამსახურში განახლებული პროექტის დამტკიცებით მიზნით გადაიგზავნება.
შეგახსენებთ, რომ შეგახსენებთ, რომ Babillon Tower-ის საინვესტიციო მოცულობა, რომელიც ზღვისპირა ქალაქში, რუსთაველის # 30-ში შენდება, 70 მლნ დოლარით იყო განსაზღვრული, თუმცა პროექტის მასშტაბის ზრდის ფონზე, ინვესტიციის მოცულობა 80 მლნ დოლარამდე გაიზარდა.
როგორც ცნობილია, კომპლექსის სიმაღლე 170 მეტრი იქნება და ის 2 კოშკისგან შედგება, საიდანაც ერთი საცხოვრებელი/საოფისე/სავაჭრო ცენტრი იქნება, ხოლო მეორე კომპლექსში - 4 ვარსკვლავიანი, მსოფლიო ბრენდის ფეშენებელური, სასტუმრო განთავსდება.
პროექტის თანახმად, Babillon Tower-ი 47 სართულიანი იქნება და შენობაში განთავსდება ასევე: მიწისქვეშა ავტოსადგომი, 2 სართულიანი სავაჭრო ცენტრი, ოფისები (7 სართული), ხოლო დარჩენილ ფართში საცხოვრებელი კომპლექსები განთავსდება და მომხმარებლებს ექნება სრული ის მომსახურება, რაც სასტუმროში.
კომპლექსში ასევე იქნება ბავშვების გასართობი მოედანი, სპა ცენტრი, ფიტნეს ცენტრი, საუნა, ღია აუზი, დახურული და ღია რესტორნები და კაფეები, ვალეტ სერვისი, ქიმწმენდა, სილამაზის სალონი და სხვა.
Babillon Tower-ის არქიტექტური კომპანია TagoArchitects-ია.
