,,ნაციონალური მოძრაობიდან” გამიჯნული ოთხეული საქართველოში ლარის გარდა სხვა საგადამხდელო საშუალების შემოღებას და ეროვნული ბანკის ნაცვლად, სავალუტო საბჭოს შექმნის იდეით გამოდის.
„ახალი პოლიტიკური ცენტრის“ ლიდერმა ზურაბ ჯაფარიძემ, დღეს გამართულ პრესკონფერენციაზე, ეროვნული ვალუტისა და ეკონომიკის გადარჩენის საკუთარ ხედვებზე ისაუბრა.
„ხაზგასმით გვინდა აღვნიშნოთ - რომ არა ეროვნული ბანკის სწორი ნაბიჯები, ხალხი და სახელმწიფო კიდე უფრო გაღარიბდებოდა. ამ ფონზე მთავრობის და ბიძინა ივანიშვილის მხრიდან საუბარი გიორგი ქადაგიძის პასუხისმგებლობაზე არის უკიდურესად საშიში. ეს დარტყმას აყენებს ფინანსურ სისტემას, აფრთხობს ინვესტორებს და აძლიერებს არასტაბილურობის განცდას. ამასთან, ეს მიანიშნებს იმაზეც, რომ მომავალი წლის თებერვალში, როდესაც გიორგი ქადაგიძეს ვადა ამოეწურება, „ქართული ოცნება“ შეეცდება პირდაპირ მართული პრეზიდენტი აირჩიოს ეროვნულ ბანკში, რაც საბოლოოდ ჩამოშლის ეროვნულ ვალუტას“, - აღნიშნა დეპუტატმა.
მისივე განმარტებით, ეროვნული ბანკის ნაცვლად, უნდა შეიქმნას სავალუტო საბჭო, ასევე, ლარი ერთადერთი საგადამხდელო საშუალება აღარ უნდა იყოს და ლარის კურსი უნდა იყოს ფიქსირებული დოლართან, ევროსთან ან ამ ვალუტების კალათასთან მიმართებაში.
„რას მივიღებთ შედეგად: ლარის გაუფასურების რისკები დავა ნულამდე; მოქალაქეებს აღარ გაუძვირდებათ უცხოურ ვალუტაში გამოტანილი სესხი; მოქალაქეებს აღარ გაუუფასურდებათ ლარში გაკეთებული დანაზოგი; მოქალაქეებს, ვისაც აქვთ ფიქსირებული ხელფასი ლარში, აღარ შეუმცირდებათ შემოსავალი; დაიკლებს საპროცენტო განაკვეთები საბანკო სესხებზე; ვეღარ მოხდება მთავრობის მხრიდან პროდუქტებზე ხელოვნურად ფასების ზრდა; ხელი შეეწყობა ინვესტიციების შემოსვლას; ხელი შეეწყობა ახალი სამუშაო ადგილების შექმნას. ამ ცვლილებების მომზადება უნდა მოხდეს უმოკლეს ვადაში, რათა მომავალი წლიდან შესაძლებელი იყოს მონეტარული სისტემის ახალ მოდელზე გადასვლა“, - განმარტავს ჯაფარიძე.
