5 ივნისს, სასტუმრო „HOLIDAY INN“-ში, ფინანსთა სამინისტროს აკადემიის, მსოფლიო ბანკისა და ევროკავშირის ორგანიზებით დაიხურა რეგიონული კონფერენცია, რომელიც კავკასიასა და შუა აზიაში საბიუჯეტო საკითხებსა და ფისკალურ პოლიტიკას მიეძღვნა.
კონფერენციის დახურვას დაესწრო და მონაწილეებს მიესალმა საქართველოს ფინანსთა მინისტრი ნოდარ ხადური.
„მნიშვნელოვანი კონფერენციაა. მოხარული ვარ, რომ საქართველო ხდება რეგიონული ჰაბი როგორც სატრანზიტო, ისე ინტელექტუალური თვალსაზრისით. თქვენ იცით, რომ მაისში ჩატარდა ევროპის რეკონსტრუქციისა და განვითარების ბანკის ყოველწლიური შეხვედრა, ორ კვირაში ვუმასპინძლებთ შავი ზღვის ვაჭრობისა და განვითარების ბანკის შეხვედრას. ჩვენ მომავალშიც გავაგრძელებთ მუშაობას იმ მიმართულებით, რომ კიდევ უფრო გაიზარდოს საქართველოს ცნობადობა და კოლეგებისთვის ჩვენი გამოცდილების გაზიარება იყოს მუდმივი პროცესი“, - განაცხადა ფინანსთა მინისტრმა, ნოდარ ხადურმა.
მონაწილეებს ასევე მიმართეს საერთაშორისო სავალუტო ფონდისა და მსოფლიო ბანკის რეგიონულმა წარმომადგენლებმა.
კონფერენციაზე სახელმწიფო უწყებების საჯარო მოხელეებმა და მსოფლიო ბანკის წარმომადგენლებმა განიხილეს საბიუჯეტო და ფისკალური პოლიტიკის შემუშავებასთან დაკავშირებული საკითხები, ასევე ისეთი თემები, როგორიცაა საჯარო ფინანსების მართვა, სახელმწიფო პროგრამების მონიტორინგი და შეფასება და სხვა.
მონაწილეებს საშუალება ჰქონდათ ერთმანეთისთვის გაეზიარებინათ გამოცდილება, საუკეთესო პრაქტიკა და რჩევები, თუ როგორ შეიმუშაონ და მართონ საჯარო ფინანსები. მონაწილეებს ასევე საშუალება ჰქონდათ გაცნობოდნენ საქართველოში მიმდინარე რეფორმებს.
რეგიონალურ კონფერენციაში მონაწილეობენ საქართველოს, თურქეთის, სომხეთის, ყირგიზეთისა და აზერბაიჯანის ფინანსთა და ეკონომიკის სამინისტროების, ცენტრალური ბანკის თანამშრომლები, ასევე, საერთაშორისო სავალუტო ფონდისა და მსოფლიო ბანკის ეკონომისტები, პროგრამის ხელმძღვანელები.
