ქუთაისში ყაზახეთიდან დამატებით ჩარტერული რეისები დაინიშნა. ეკონომიკისა და მდგრადი განვითარების სამინისტროს ინფორმაციით, 7 ივნისიდან საქართველოში საჰაერო მიმოსვლის განხორციელებას დაიწყებს ყაზახეთის ავიაკომპანია “Bek Air”, რომელიც შეასრულებს მრავალჯერად ჩარტერულ რეისებს ქუთაისის მიმართულებით ყაზახეთის ქალაქებიდან - აქტაუ და ატირაუ. ფრენები განხორციელდება მიმდინარე წლის სექტემბრის ჩათვლით.
აღნიშნული რეისები მთლიანად ორიენტირებული იქნება ყაზახეთიდან ტურისტული ჯგუფების ტრანსპორტირებაზე. საქართველოში მიმღები მხარე იქნება კურორტი საირმე.
