აჭარის ფინანსთა და ეკონომიკის მინისტრი დავით ბალაძე ჩაქვში, Dreamland Oasis-ის მშენებლობის პროცესს გაეცნო. სამუშაოთა მიმდინარეობისა და პროექტის დეტალები მინისტრს პროექტის მენეჯერმა კოკა გეგუჩაძემ გააცნო.
Dreamland Oasis- ი ჩაქვში, სასტუმრო „ოაზისის“ ირგვლივ არსებულ ტერიტორიაზე მასშტაბური პროექტის განხორციელებას ითვალისწინებს. პროექტის მიხედვით ტერიტორიაზე ორი სასტუმრო კომპლექსი, აპარტოტელები, სხვადასხვა გასართობი ცენტრები, ბოულინგ ცენტრი, რესტორნები, ღია და დახურული კაფეები, აუზები და სხვა ობიექტები განთავსდება.

ამ ეტაპზე ორი 120 ნომრიანი სასტუმრო კომპლექსის მშენებლობა უკვე მიმდინარეობს. აქტიურ ფაზაშია ასევე 11 ოთხსართულიანი აპარტოტელის მშენებლობა. აპარტოტელებში სულ 232 აპარტამენტი განთავსდება. სასტუმრო კომპლექსებისა და აპარტოტელების მშენებლობა 8 ჰექტარზე განხორციელდება.

პროექტის ღირებულება 105 მილიონი ლარია. ამ ეტაპზე პროექტის ფარგლებში 300 ადამიანია დასაქმებული. სასტუმროები ექსპლუატაციაში მიმდინარე წლის ზაფხულის სეზონზე შევა. „Dreamland Oasis“- ის მშენებლობა კი სრულად 2019 წელს დასრულდება.