სამშენებლო ობიექტები დღგ-სა და K2 მოსაკრებლის გადახდისაგან იმ პირობით განთავისუფლდებიან, თუ ისინი მშენებლობის დასრულებას 3 წლის ვადაში მოახერხებენ.
"საქართველოს მთავრობის გადაწყვეტილებით დღგ-სგან განთავისუფლდება ის ობიექტები, რომლებზეც სამშენებლო ნებართვა გაცემულია 2008 წლის აგვისტომდე და დღემდე არ არის დასრულებული, იმ პირობით თუ მომდევნო 3 წლის განმავლობაში აღნიშნულ ობიექტებზე გაგრძელდება სამშენებლო სამუშაოები და აღნიშნულ 3 წელიწადშივე დასრულდება მშენებლობა. მიახლოებით ეს ეხება 15 ათასზე მეტ ფიზიკურ პირს. ჯამში დავალიანება, ანუ რომლის ჩამოწერა/პატიება მოხდება შეადგენს 100-დან 200 მლნ ლარამდე",- აცხადებს საქართველოს ფინანსთა მინისტრის მოადგილე ლაშა ხუციშვილი.
მინისტრის მოადგილის განმარტებით, აღნიშნული შეღავათი მშენებლობის დარგის წახალისებისათვის კეთდება. ხუციშვილის განმარტებითვე, შეღავათებს ათეულობით კომპანია მიიღებს.
შეგახსენებთ, რომ მთავრობის გადაწყვეტილებით, ის სამშენებლო ობიექტები, რომელთა მშენებლობაც დაიწყო 2008 წლის აგვისტომდე და დღემდე არ დასრულებულა, სახელმწიფოს წინაშე არსებული ვალდებულებებისაგან, კერძოდ, დღგ-სა და K2 მოსაკრებლის გადახდისაგან განთავისუფლდებიან. მთავრობას შესაბამისი საკანონმდებლო ინიციატივა უკვე მზადს აქვს და ისდ მალე განსახილველად და დასამტკიცებლად საკანიონმდებლო ორგანოში გადაიგზავნება.
ქვეყნის პრემიერ-მინისტრის ირაკლი ღარიბაშვილის განმარტებით, 2008 წლის ფინანსურმა კრიზისმა და აგვისტოს ომმა მნიშვნელოვანი ნეგატიური გავლენა მოახდინა სამშენებლო სექტორზე, რამაც შეაფერხა სამშენებლო დარგის განვითარება.
„საბანკო დაკრედიტების გამკაცრებამ და უძრავ ქონებაზე მოთხოვნის შემცირებამ, სერიოზული ზიანი მიაყენა სამშენებლო დარგს. შედეგად კი, კომპანიებს სახელმწიფოს მიმართ მნიშვნელოვანი ვალდებულებები დაუგროვდათ, რაც მათ მძიმე ტვირთად აწვება და ხელს უშლის ამ დარგის განვითარებას,"-აღნიშნა პრემიერმა.
მისივე თქმით, მთავრობის მიერ მიღებული გადაწყვეტილება ხელს შეუწყობს ქვეყანაში სამშენებლო სექტორის შემდგომ განვითარებას და ამ დარგიდან დადებითი ეფექტების გადაცემას სხვა სფეროებზე, კერძოდ, სამშენებლო მასალების და სარემონტო მომსახურების სფეროებზე.
