მე პირადად, როგორც ეკონომიკის მინისტრი, რა თქმა უნდა, ძალიან შეწუხებული ვარ იმით, რომ დოლარში სესხის მქონე კომპანიებს და ადამიანებს ხარჯები გაუძვირდათ, აღნიშნულის შესახებ განცხადება ჟურნალისტებთან საქართველოს ეკონომიკისა და მდგრადი განვითარების მინისტრმა გიორგი კვირიკაშვილმა ლარის კურსთან დაკავშირებით გააკეთა. როგორც მინისტრმა განმარტა ლარის კურსთან დაკავშირებით მთავრობა ერთიანი კოორდინაციით მუშაობს.
"რაც შეეხება ლარის კურსს: გვესმის, რომ სიტუაცია მარტივი არ არის, ამას ვაცნობიერებთ, აბსოლუტურად ვფლობთ სიტუაციას, ვაცნობიერებთ იმ გამოწვევებს, რაც გვაქვს და ერთიანი კოორდინაციით ვუდგებით ამ საკითხს. ვიცით, რა უნდა გავაკეთოთ იმისთვის, რომ დავაბალანსოთ საგადამხდელო ბალანსის დეფიციტი და კონკრეტული ნაბიჯები და სამოქმედო გეგმა გვაქვს დამატებითი საინვესტიციო პროექტების კუთხით, ტურიზმისა და ექსპორტის მიზნობრივი წახალისების კუთხით. ამ ნაბიჯების გადადგმა დაწყებულია, კონკრეტული სამოქმედო გეგმა ფაქტიურად უკვე ხორციელდება, უბრალოდ მისი შედეგები მყისიერი, რა თქმა უნდა, არ არის. ჩვენ ვფიქრობთ, რომ რამდენიმე თვეში კონკრეტული შედეგები იქნება ამ მიმართულებით. კიდევ ერთხელ ვაცხადებ - კოორდინაცია გვაქვს, კარგად ვაცნობიერებთ სიტუაციას და ძალიან კარგად ვხედავთ იმ ნაბიჯებს, რაც არის გადასადგმელი. ამ მიმართულებით კონკრეტულ ქმედებებს ვახორციელებთ. მე პირადად, როგორც ეკონომიკის მინისტრი, რა თქმა უნდა, ძალიან შეწუხებული ვარ იმით, რომ დოლარში სესხის მქონე კომპანიებს და ადამიანებს ხარჯები გაუძვირდათ, მაგრამ, კიდევ ერთხელ ვამბობ, ეს არის კონკრეტული გარემოებიდან გამომდინარე და ჩვენ ამ ეფექტების განეიტრალებაზე აქტიურად ვმუშაობთ", - განაცხადა გიორგი კვირიკაშვილმა.
