ბათუმის პირსის ბედს სასამართლო გადაწყვეტს. გავრცელებული ინფოტმაციით, ბათუმის პლაჟზე, 35 მეტრი სიგრძის პირსს, რომელიც შპს „batunn"-მა 2011 წელს უკანონოდ ააშენა, დანგრევა ემუქრება.
კომპანია „batunn"-ში განმარტავენ, რომ კომპანიამ ბათუმის მერიის ზედამხედველობის გადაწყვეტილება სასამართლოში გაასაჩივრა და რის შედეგადაც პირსთან დაკავშირებით აღსრულება შეჩერდა.
"სააღსრულებლოს გადაწყვეტილრება დემონტაჟთან დაკავშირებით სასამართლოს გადაწვეტილებით შეჩერებულია. გაცნობებთ ყველას ვინც დაინტერესებულია ამ საკითხით, ამჟამინდელი მდგომარეობით ქალაქ ბათუმის მერიის მიერ უკან დაბრუნებული პროექტი გასაჩივრებულია. ასე, რომ სასამართლოს საბოლოო გადაწყვეტილების მიღებამდე "პიერ ბათუმის" ობიექტს დემონტაჟი არ ემუქრება.
ჩვენ მერიაში პროექტი რამდენჯერმე შევიტანეთ, თუმცა დაგვიწუნეს და უკან დაგვიბრუნეს. შემდეგ ბათუმის მერიის ზედამხედველობის სამსახურმა სხვა მოთხოვნები წამოგვიყენა, რომელიც შევასრულეთ და დაჯარიმების საფუძველზე ჩვენთვის ნებართვა უნდა მოეცა, როგორც ეს კანონმდებლობითაა გათვალისწინებული. თუმცა მათ ნებართვა არ მოგვცეს და ამიტომ ჩვენ გავასაჩივრეთ", - განაცხადა "პიერ ბათუმის"
დირექტორის თანაშემწემ მინდია გურგენიძემ.
გაზეთ "ბათუმელების" ინფორმაციით, 35 მეტრი სიგრძის ხიდით პირსის შენობის აგება ბათუმის პლაჟზე მერიის ქონების მართვის სამსახურსა და შპს „ batunn" -ს შორის შეთანხმების მთავარი პირობა იყო. ხელშეკრულება 2010 წელს გააფორმეს. სანაცვლოდ კომპანიამ ბათუმის მერიისგან პლაჟზე, ბულვარის მთავარ შესასვლელთან ახლოს, 7 392 კვ/მეტრი მიწის ნაკვეთი 29-წლიანი სარგებლობის უფლებით მიიღო. ამ ადგილზე კომპანიამ სპორტულ-გასართობი კომპლექსი „PIER BATUMI" გახსნა. სახელშეკრულებო პირობა კომპანიის მხრიდან ბათუმის ბიუჯეტში ყოველწლიურად 15 000 ლარის ოდენობით საიჯარო გადასახადსაც ითვალისწინებდა.
გასართობი კომპლექსი ღია და დახურულ რესტორანს, ორ მაღაზიას, სწრაფი კვების ობიექტსა და ჩილიმ ბარს აერთიანებს, მომსახურებაში შედის უკაბელო ინტერნეტით სარგებლობაც.
შპს „batunn" -მა მერიასთან დადებული პირობა შეასრულა, მაგრამ კომპანიამ პლაჟზე, ბულვარის მთავარ შესასვლელთან, 35 მეტრი სიგრძის პირსის შენობა ისე ააშენა, რომ არც სამშენებლო ნებართვა ჰქონია და არც გარემოზე ზემოქმედების შეფასების დოკუმენტი.
2013 წლის ნოემბერში კომპანია უკანონო მშენებლობის გამო 3000 ლარით დააჯარიმეს და ნებართვის მისაღებად სამთვიანი ვადა მისცეს. სამი თვის შემდეგ კი კომპანიას კანონმდებლობის შესაბამისად გაორმაგებული ჯარიმა 9 000 ლარი გადაახდევინეს.
"ბათუმელების" ინფორმაციითვე, შპს „batunn"- მა თავის დროზე ბულვარში 5 მილიონი დოლარის ინვესტიცია განახორციელა.
