7 თებერვალს 13:00 საათზე სასტუმროში „Holiday Inn Tbilisi", მეწარმეობის განვითარების სააგენტო მართავს სამუშაო სახის შეხვედრას „აწარმოე საქართველოში" პროგრამაში ჩართული 12 ბანკის წარმომადგენლებთან, მათ შორის რეგიონალური მენეჯერები და ფილიალების მმართველები. დამსწრე პირებს შორის ასევე იქნებიან ბანკების ასოციაციის, სოფლის მეურნეობის პროექტების მართვის სააგენტოსა და სახელმწიფო ქონების ეროვნული სააგენტოს წარმომადგენლები.
შეხვედრის მიზანია პროგრამის „აწარმოე საქართველოში" დეტალური გაცნობა ბანკების წარმომადგენლებისთვის და საქართველოს რეგიონებში „აწარმოე საქართველოში" პროგრამასთან დაკავშირებით ინფორმაციის ხელმისაწვდომობის გაზრდა. ეკონომიკისა და მდგრადი განვითარების მინისტრის მოადგილე, ქეთევან ბოჭორიშვილი და მეწარმეობის განვითარების სააგენტოს დირექტორი, გიორგი ციკოლია მიმოიხილავენ „აწარმოე საქართველოში" პროგრამის მიმდინარეობას, სააგენტოს მიერ პირველი წლის განმავლობაში განხორციელებულ საქმიანობას, სიახლეებს სალიზინგო მომსახურების ხელმისაწვდომობასთან დაკავშირებით და ცვლილებას სესხის გირაოთი უზრუნველყოფასთან მიმართებაში, კერძოდ სახელმწიფოს მხრიდან 30%-ის ნაცვალდ მოხდება სესხის უზრუნველყოფის ძირითადი საგნის ღირებულების 50%-ის თანადაფინანსება, რაც კიდევ უფრო ხელმისაწვდომს გახდის ფინანსებს ახალი საწარმოს დასაარსებლად. პრეზენტაციის დასასრულს დრო დაეთმობა პროგრამის განხორციელებასთან დაკავშირებული საკითხების განხილვას და ბანკების წარმომადგენლების მოსაზრებების და პროგრამის ფარგლებში უკვე არსებული გამოცდილების გაზიარებას. შენიშვნა „აწარმოე საქართველოში" პროგრამის ფარგლებში საქართველოს მაშტაბით ფინანსურ რესურსებზე ხელმისაწვდომობისა და ფიზიკური ინფრასტრუქტურით უზრუნველყოფის კომპონენტით უკვე სარგებლობს 67 მეწარმე და დაწყებულია შესაბამისი პროექტების განხორციელება. პროექტების ჯამური მოსალოდნელი ინვესტიცია დაახლოებით 103 400 000 აშშ დოლარია. ზემოხსენებული პროექტების თითქმის ნახევარი საქართველოს რეგიონებზე მოდის.
როგორც ცნობილია, „აწარმოე საქართველოში" ჩართულია საქართველოს ბაზარზე მოქმედი შემდეგი ბანკები: „თი ბი სი" ბანკი, „კაპიტალ" ბანკი, „კორ სტანდარტ" ბანკი, „ლიბერთი" ბანკი," საქართველოს ბანკი", „ვი თი ბი" ბანკი, ბანკი "რესპუბლიკა", „პროკრედიტ" ბანკი, „ბაზის" ბანკი, „პროგრეს" ბანკი, „ხალიკ ბანკი საქართველო", ბანკი „ქართუ". პროგრამის ბენეფიციარებისათვის სახელმწიფოს მხრიდან 30%-ის ნაცვალდ მოხდება სესხის უზრუნველყოფის ძირითადი საგნის ღირებულების 50%-ის თანადაფინანსება, რაც კიდევ უფრო ხელმისაწვდომს გახდის ფინანსებს ახალი საწარმოს დასაარსებლად.
როგორც სააგენტოში განმარტავენ, „აწარმოე საქართველოში" პროგრამის ფინანსური ხელმისაწვდომობის კომპონენტი კიდევ უფრო მეტ მეწარმეს უხსნის გზას სესხის ასაღებად და ფაქტიურად უგვარებს ერთ- ერთ ყველაზე დიდ დაბრკოლებას, კერძოდ სესხის უზრუნველყოფის საკითხს. 2014 წლის დეკემბერში პროგრამას „აწარმოე საქართველოში" ასევე დაემატა სალიზინგო მომსახურებაზე გამარტივებული ხელმისაწვდომობის კომპონენტი, რომლის ფარგლებშიც მეწარმეობის განვითარების სააგენტო უკვე 3 კომპანიას უწევს სალიზინგო მომსახურების თანადაფინანსებას. მაქსიმალური პროცენტი რაც შეიძლება სალიზინგო კომპანიამ მოითხოვოს მომსახურებისათვის არის 15%. საშუალო საპროცენტო განაკვეთი 12-15%-მდე მერყეობს, საიდანაც პირველი 2 წლის განმავლობაში 12%-ს „აწარმოე საქართველოში" პროგრამაში ჩართულ ბენეფიციარებს სახელმწიფო დაუფინანსებს.