5 თებერვალს საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი აზიის განვითარების ბანკის ცენტრალური და დასავლეთ აზიის რეგიონული დეპარტამენტის გენერალურ დირექტორს კლაუს გერჰაუზერს შეხვდა.
შეხვედრის მთავარ მიზანს საქართველოსა და აზიის განვითარების ბანკს შორის არსებული და სამომავლო თანამშრომლობის განხილვა წარმოადგენდა. განსაკუთრებული ყურადღება გამახვილდა არსებულ თანამშრომლობაზე სატრანსპორტო ინფრასტრუქტურის განვითარების მიმართულებით.
შეხვედრაზე მხარეებმა ისაუბრეს ასევე ყოველწლიური მაღალი დონის კონფერენციის - „აბრეშუმის გზის" ფორუმის ჩატარების თაობაზე, რომელიც 2015 წელს საქართველოს პრემიერ-მინისტრის, ირაკლი ღარიბაშვილის ინიციატივით გაიმართება.
როგორც საქართველოს ვიცე-პრემიერმა გიორგი კვირიკაშვილმა განაცხადა, საქართველომ უნდა გამოიყენოს თავისი სტრატეგიული მდებარეობა ევროპის, აზიისა და შუა აღმოსავლეთის დასაკავშირებლად. მისი განცხადებით, მაღალი დონის შეხვედრები, დაინტერესებული სახელმწიფოებისა და საერთაშორისო ფინანსური ინსტიტუტების მონაწილეობით, ხელს შეუწყობს ისტორიული "აბრეშუმის გზის" მარშრუტზე ახალი საინვესტიციო პროექტების ინიცირებას და განხორციელებას.
აზიის განვითარების ბანკის წარმომადგენელმა აღნიშნულ პროექტში ბანკის თანამშრომლობის თაობაზე სრული მზადყოფნა გამოთქვა და დასძინა, რომ ბანკი გახდება მთავარი პარტნიორი აღნიშნული პროექტის განხორციელების საკითხში.
შეხვედრის დროს მხარეებმა ასევე ისაუბრეს ეკონომიკისა და მდგრადი განვითარების სამინისტროს მიერ დაგეგმილი სხვა მნიშვნელოვანი პროექტების შესახებ, რომლებიც ხელს უწყობს ქვეყნის ეკონომიკურ განვითარებას.
