5 თებერვალს, საქართველოს ფინანსთა მინისტრი ნოდარ ხადური აზიის განვითარების ბანკის ცენტრალური და დასავლეთ აზიის დეპარტამენტის გენერალურ დირექტორს, კლაუს გერჰაუზერს შეხვდა.
საქართველოში ვიზიტის ფარგლებში, დღესვე ფინანსთა სამინისტროში, საქართველოსა და აზიის განვითარების ბანკს (ADB) შორის გაფორმდა „ურბანული მომსახურების გაუმჯობესების საინვესტიციო პროგრამა - პროექტი 4"-ის სასესხო ხელშეკრულება, რომელიც ითვალისწინებს საქართველოსთვის 108 მლნ აშშ დოლარის შეღავათიანი ფინანსური რესურსის გამოყოფას.
ხელშეკრულებას ხელი მოაწერეს საქართველოს მთავრობის სახელით, საქართველოს ფინანსთა მინისტრმა ნოდარ ხადურმა და აზიის განვითარების ბანკის ცენტრალური და დასავლეთ აზიის დეპარტამენტის გენერალურმა დირექტორმა კლაუს გერჰაუზერმა.
ხელმოწერის ცერემონიას ასევე დაესწრნენ რეგიონული განვითარებისა და ინფრასტრუქტურის მინისტრი დავით შავლიაშვილი და საქართველოში ADB-ის მუდმივი წარმომადგენელი ქეითი ჯულიანი.
აღნიშნული პროექტის ფარგლებში (IV ტრანში) დაგეგმილია ქვეყნისთვის ისეთი მნიშვნელოვანი ინფრასტრუქტურული პროექტების დაფინანსება როგორებიცაა ქალაქ ზუგდიდში წყალმომარაგების სისტემის მშენებლობა და ფოთში კანალიზაციის სისტემის რეაბილიტაციის სამუშაოები, მათ შორის, კანალიზაციის გამწმენდი ნაგებობის მშენებლობა.
დღესვე საპროექტო ხელშეკრულებას ხელი მოაწერა საქართველოს გაერთიანებული წყალმომარაგების კომპანიის დირექტორმა ვლადიმერ ლაზარიშვილმა.
2011-2019 წლებში ურბანული მომსახურების გაუმჯობესების პროექტების დასაფინანსებლად საქართველოსა და აზიის განვითარების ბანკს (ADB) შორის 2011 წელს ხელმოწერილი „ურბანული მომსახურების გაუმჯობესების საინვესტიციო პროგრამის" დაფინანსების ჩარჩო ხელშეკრულებით (FFA- 500 მლნ აშშ დოლარის ოდენობის სესხი) გათვალისწინებულია წყალმომარაგებისა და კანალიზაციის სისტემის გასაუმჯობესებლად პროექტების განხორციელებას ქვეყნის 7 ტურისტულ ცენტრსა და მსხვილ ურბანულ დასახლებაში (მესტია, ანაკლია, ქუთაისი, ფოთი, ურეკი, ზუგდიდი, მარნეული).
FFA-ის ფარგლებში ამჟამადუკვე გამოყოფილია 3 ტრანში ჯამურად დაახლოებით 218 მლნ აშშ დოლარის ოდენობით, შემდეგი სამუშაოებისთვის:
 I ტრანში: მესტიაში და ანაკლიაში წყალმომარაგების სათავე ნაგებობების მშენებლობა, წყალმომარაგების სისტემების ნაწილობრივ მშენებლობა-რეაბილიტაცია ქუთაისსა (I ფაზა) და ფოთში. ურეკის წყალმომარაგებისა და კანალიზაციის სისტემების ნაწილობრივი მშენებლობა;
 II ტრანში: ანაკლიასა და მესტიაში წყალმომარაგებისა და კანალიზაციის სისტემის რეკონსტრუქცია და რეაბილიტაცია;
 III ტრანში: ქალაქ ქუთაისში წყალმომარაგების სისტემის რეაბილიტაცია და ურეკში წყლისა და კანალიზაციის სისტემების მშენებლობა.