ფოთსა და ზუგდიდში წყალმომარაგებისა და წყალარინების სისტემის გაუმჯობესება აზიის განვითარების ბანკის მიერ გამოყოფილი თანხებით მოხდება. სასესხო ხელშეკრულება ბანკსა და საქართველოს მთავრობას შორის დღეს გაფორმდა, რის შედეგადაც საქართველო ფოთსა და ზუგდიდის წყალმომარაგებისა და წყალარინების სისტემის გაუმჯობესებისათვის 108 მლნ დოლარს მიიღებს.
აღნიშნული ხელშეკრულება 2014-2018 წლების ქვეყანასთან პარტნიორობის სტრატეგიის (Country Partnership Strategy, CPS) დაწყების ნიშნულია.
სასესხო ხელშეკრულებას ხელი მოაწერეს საქართველოს ფინანსთა მინისტრმა ნოდარ ხადურმა და აზიის განვითარების ბანკის ცენტრალური და დასავლეთ აზიის დეპარტამენტის გენერალურმა დირექტორმა კლაუს გერჰაუზერმა.
"აზიის განვითარების ბანკი ქვეყანასთან პარტნიორობის ახალი სტრატეგია საქართველოს დაეხმარება ინკლუზიური ზრდის გზაზე არსებული გარკვეული ბარიერების გადალახვაში, მათ შორის იმ ხარვეზების აღმოფხვრაში, რომლებიც არსებობს ტრანსპორტის, ენერგეტიკისა და ძირითადი ინფრასტრუქტურის სფეროში, ასევე კერძო სექტორისათვის ფინანსების არასათანადო ხელმისაწვდომობის საკითხში. „ინფრასტრუქტურის გაძლიერება, პოლიტიკური რეფორმებისა და შესაძლებლობების განვითარების მხარდაჭერის პარალელურად, ხელს შეუწყობს ინვესტიციების სტიმულირებას, სამუშაო ადგილების შექმნასა და შემოსავლის წყაროების გაჩენას",- განაცხადა " - განაცხადა საქართველოში აზიის განვითარების ბანკის მუდმივი წარმომადგენლობის დირექტორმა ქეითი ჯულიანმა.
აღსანიშნავია, რომ წყალმომარაგებისა და წყალარინების სისტემის პროექტი, რომელიც რიგით მეოთხეა 500 მილიონი აშშ დოლარის მოცულობის მრავალტრანშიანი საფინანსო ინსტრუმენტის ფარგლებში, მიზნად ისახავს ზუგდიდში წყალმომარაგების სისტემის, ხოლო ფოთში - წყალარინების სისტემის გაუმჯობესებას. ამჟამად ზუგდიდის მოსახლეობის 84% ვერ სარგებლობს წყალგაყვანილობის სისტებით, მაშინ, როდესაც ახალი სისტემა უზრუნველყოფს 24-საათიან წყალმომარაგებას.
პროექტის მიხედვით, ფოთში აშენდება მსხვილი საკანალიზაციო კოლექტორი და წყალგამწმენდი ნაგებობა, რომელიც მოემსახურება მთელს ქალაქს. გაუმჯობესება სარგებელს მოუტანს ორივე ქალაქის დაახლოებით 34000 ოჯახს.
ამას გარდა, სესხის თანხებით და საქართველოს გაერთიანებული წყალმომარაგების კომპანიის მომსახურების ცენტრების მეშვეობით დაფინანსდება მოსახლეობისთვის ინფორმაციის გაზიარება სანიტარული და ჰიგიენური ნორმების შესახებ. ამ დროისათვის, აზიის განვითარების ბანკს უკვე დამტკიცებული აქვს პროგრამის სამი ტრანში 218 მილიონი აშშ დოლარის საერთო ოდენობით და ამჟამად მიმდინარეობს 75 მილიონი აშშ დოლარის სესხის განხილვა, რომელიც მიზნად ისახავს წყალარინების სისტემის გაყვანას ზუგდიდში და წყალგამწმენდ ნაგებობას მესტიაში.
ქვეყანასთან პარტნიორობის ახალი სტრატეგია ხელს შეუწყობს მდგრადი და ინკლუზიური ზრდის პროცესს და რეგიონული კავშირების ინტენსიფიკაციას. მიუხედავად იმისა, რომ საქართველო აგბ-ის უახლესი წევრია - იგი 2007 წელს შეუერთდა ბანკს - დახმარება სწრაფად იზრდება და 2014 წლის 31 დეკემბრის მდგომარეობით დამტკიცებული სესხების ოდენობამ 1.6 მილიარდი აშშ დოლარი შეადგინა.
აზიის განვითარების ბანკი, რომლის სათავო ოფისი მანილაში, ფილიპინებზე მდებარეობს, მიზნად ისახავს აზიასა და წყნარი ოკეანის რეგიონში სიღარიბის დონის შემცირებას ეკონომიკური ზრდის, გარემოსდაცვითი ღონისძიებების და რეგიონული ინტეგრაციის მეშვეობით. დაარსდა რა 1966 წელს, ბანკი აერთიანებს 67 წევრ ქვეყანას, საიდანაც 48 აღნიშნული რეგიონის წარმომადგენელია.
