სასტუმრო „ქორთიარდ მერიოტში" ოთხი ქვეყნის - შვეიცარიის, ნორვეგიის, ისლანდიისა და ლიხტენშტეინის სამთავრობო დელეგაციის წევრები საქართველოს მთავრობის წარმომადგენლებს შეხვდნენ, სადაც ევროპის თავისუფალი ვაჭრობის ასოციაციასთან (EFTA) საქართველოს თავისუფალი ვაჭრობის შესახებ მოლაპარაკებების პირობები და ვადები განიხილეს. შეხვედრის დასრულების შემდეგ საქართველოს ეკონომიკისა და მდგრადი განვითარების მინისტრის მოადგილემ, მიხეილ ჯანელიძემ და ნორვეგიის ვაჭრობისა და მრეწველობის სამინისტროს წარმომადგენელმა ჯენ ფარბერგმა ერთობლივი ბრიფინგი გამართეს.
„დღევანდელ სხდომაზე მივიღეთ გადაწყვეტილება, რომ საქართველოსა და ევროპის თავისუფალი ვაჭრობის ასოციაციას შორის თავისუფალი ვაჭრობის შესახებ მოლაპარაკებების პირველი რაუნდი გაიმართება 2015 წლის სექტემბრის დასაწყისში. ჩვენ უკვე ივნისისთვის გავცვლით შეთანხმების ტექსტს. მოლაპარაკებები ოთხ რაუნდად წარიმართება და ვფიქრობთ, რომ ერთი წლის ვადაში დასრულდება. ეს იქნება ახალი შესაძლებლობა ქართული ბიზნესისთვის, ახალი ბაზარი ჩვენი საექსპორტო პროდუქციისთვის. ეს იქნება დამატებითი ინტერესი EFTA-ს წევრი ოთხი ქვეყნის კომპანიებისთვის, რომ საქართველოში განახორციელონ ინვესტიციები, შექმნან სამუშაო ადგილები, შემოიტანონ ახალი ტექნოლოგიები და ცოდნა, რომელიც ძალიან მნიშვნელოვანია ჩვენი ეკონომიკური განვითარებისთვის. ეს არის ახალი, სტაბილური, მაღალმსყიდველუნარიანი ბაზარი, რომელიც შეთანხმების გაფორმების შედეგად გაიხსნება საქართველოს პროდუქციისთვის" - განაცხადა მიხეილ ჯანელიძემ.
მოლაპარაკებების პირველი რაუნდი თბილისში გაიმართება, სადაც ექსპერტებთან და EFTA-ს ქვეყნების წარმომადგენლებთან ერთად მოხდება ყველა საკითხის განხილვა, რომელიც შეტანილი იქნება თავისუფალი ვაჭრობის შეთანხმებაში. მიხეილ ჯანელიძის თქმით, ეს იქნება ყოვლისმომცველი შეთანხმება, რომელიც მოიცავს საქონლით ვაჭრობისა და სატარიფო ლიბერალიზაციის საკითხებს, ასევე არასატარიფო ბარიერების გადალახვის შესაძლებლობებს, მომსახურებით ვაჭრობის საკითხებს, ასევე კონკურენციის პოლიტიკას, ინტელექტუალური საკუთრების უფლებებს, საბაჟო თანამშრომლობას, მდგრადი განვითარებისა და სხვა მნიშვნელოვან მიმართულებებს. როგორც EFTA-ს მხრიდან მთავარმა მომლაპარაკებელმა, ნორვეგიის ვაჭრობისა და მრეწველობის სამინისტროს წარმომადგენელმა ჯენ ფარბერგმა აღნიშნა, შთამბეჭდავია ის რეფორმები, რაც საქართველოში ბიზნეს კლიმატის გაუმჯობესების კუთხით გატარდა. „ძალიან მნიშვნელოვანია ჩვენთვის, რომ ქართულ ბაზარზე ისეთივე შეღწევადობა ქონდეთ ჩვენს კომპანიებს, როგორიც აქვთ ევროკავშირის კომპანიებს. ჩვენ მზად ვართ გავხსნათ ბაზარი ქართული კომპანიებისთვის და ქართველი ექსპორტიორებისთვის, რაც ხელს შეუწყობს ჩვენს ქვეყნებს შორის ეკონომიკური ურთიერთობების გაღრმავებას. თავისუფალი სავაჭრო შეთანხმების დასრულებას მოუთმენლად ველოდებით" - აღნიშნა ჯენ ფარბერგმა.
შეგახსენებთ, რომ ევროპის თავისუფალი ვაჭრობის ასოციაციის (EFTA) ოთხი ქვეყანა - შვეიცარია, ნორვეგია, ისლანდია და ლიხტენშტეინი ევროკავშირის წევრები არ არიან. შესაბამისად, EFTA-სთან თავისუფალი ვაჭრობის შეთანხმების გაფორმების შედეგად საქართველოში წარმოებულ საქონელსა და მომსახურებას დამატებით 4 ქვეყნის 12 მილიონიანი ბაზარი გაეხსნება.
EFTA-ს შეთანხმებები თითქმის ყველა იმ საკითხს მოიცავს, რასაც საქართველოსა და ევროკავშირს შორის ღრმა და ყოვლისმომცველი თავისუფალი სავაჭრო სივრცის შეთანხმება ითვალისწინებს. EFTA-ს წევრი სახელმწიფოები აწარმოებენ საქართველოსთვის ისეთი მნიშვნელოვანი საექსპორტო პროდუქციის იმპორტს, როგორიცაა მინერალური და მტკნარი წყლები, ყურძნის ნატურალური ღვინოები, კარტოფილი და სხვა ბოსტნეული, თხილი და კაკალი, კენკროვანი ხილი, სანელებლები, ხილის და ბოსტნეულის წვენები. საქონლისა და მომსახურების თავისუფალი გადაადგილება მნიშვნელოვნად შეუწყობს ხელს საქართველოს საექსპორტო და საინვესტიციო პოტენციალის ზრდას, ასევე ეტაპობრივად ახალი საწარმოებისა და სამუშაო ადგილების შექმნას. აღსანიშნავია, რომ ეს იქნება პირველი საერთაშორისო შეთანხმება, რომელსაც საქართველო ისლანდიასა და ლიხტენშტეინთან გააფორმებს
