2014 წელს, საგზაო ინფრასტრუქტურის განვითარებისთვის საავტომობილო გზების დეპარტამენტმა 526 მილიონი ლარის ღირებულების პროექტები განახორციელა. რეგიონული განვითარებისა და ინფრასტრუქტურის სამინისტროს „საავტომობილო გზების დეპარტამენტის" თავმჯდომარემ ვაჟა ფანჩულიძემ დღეს საზოგადოებას უწყების 2014 წლის საქმიანობის ანგარიში წარუდგინა და განმარტა, რომ 2014 წლის მაჩვენებლებით, საგზაო ინფრასტრუქტურის განვითარებისა და ექსპლუატაციისათვის დაგეგმილი ბიუჯეტი კი 97%-ით შესრულდა.
უწყების ხელმძღვანელის განცხადებით, 2014 წლის, საქართველოს რეგიონული განვითარებისა და ინფრასტრუქტურის სამინისტროს პრიორიტეტული მიმართულება საგზაო სექტორში ჩქაროსნული გზატკეცილის მშენებლობის პროექტებია. გასულ წელს ჩქაროსნულ ავტომაგისტრალზე დამატებით 40 კილომეტრი ახალი გზა გაიხსნა (ქუთაისის შემოვლითი გზა 32 კმ. და რუსის-აგარის 8კმ-იანი მონაკვეთი), რაც 2013 წელთან შედარებით 24.6 კმ-ით, ხოლო 2012 წელთან შედარებით კი 38.5 კმ-ით მეტია.
გასულ წელს ჩქაროსნული გზატკეცილის სამშენებლო აქტივობა 7 სხვადასხვა მონაკვეთზე, ჯამში 131 კმ გზაზე მიმდინარეობდა. სარეაბილიტაციო სამუშაოები 265 კილომეტრიან მონაკვეთზე, მათ შორის ტურისტულ ობიექტებთან და ტაძრებთან მისასვლელ გზებზე განხორციელდა. კაპიტალურად შეკეთდა 42 სახიდე გადასასვლელი, რეაბილიტაციის პროექტის ფარგლებში კი 11 ახალი ხიდი აშენდა.
"საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი საგზაო ინფრასტრუქტურის გაუმჯობესების პროექტებს საქართველოს სახელმწიფო ბიუჯეტისა და დონორი ორგანიზაციების დაფინანსებით ახორციელებს. საავტომობილო გზების მიმდინარე შეკეთებისა და ზამთარში გზის მოვლა-შენახვის სამუშაოებისთვის ბიუჯეტიდან 36.7 მლნ. ლარი დაიხარჯა", - აღნიშნა „საავტომობილო გზების დეპარტამენტის" თავმჯდომარემ ვაჟა ფანჩულიძემ.
2014 წელს ნაპირდაცვითი ღონისძიებები გატარდა 26 ობიექტზე. 31 ობიექტზე კი სტიქიური მოვლენების პრევენციისა და მათი შედეგების სწრაფი ლიკვიდაციის ღონისძიებები განხორციელდა, რომლისთვისაც 9 მლნ. 179 ათასი ლარი დაიხარჯა.
2014 წელს „შიდასახელმწიფოებრივი და ადგილობრივი გზების მესამე პროექტის" (SLRP III) ფარგლებში საქართველოს მთავრობასა და მსოფლიო ბანკს შორის სასესხო ხელშეკრულება გაფორმდა, სესხის მოცულობამ 93,75 მლნ აშშ დოლარი შეადგინა და 200 კმ-ზე მეტი სიგრძის სხვადასხვა გზის მონაკვეთის რეაბილიტაციას ითვალისწინებს.
აღსანიშნავია, რომ ანგარიშის პრეზენტაციას რეგიონული განვითარებისა და ინფრასტრუქტურის მინისტრი დავით შავლიაშვილი, სახელმწიფო-რწმუნებულ გუბერნატორები, დონორი ორგანიზაციებისა და მედიის წარმომადგენლები ესწრებოდნენ.
